Атырау облысында жасөспірім жаппай төбелес туралы жалған хабар берген
Облыстық полиция департаменті баспасөз қызметінің ақпаратына қарағанда, Жылыой ауданында тұратын жасөспірімнің полицияға жалған хабар бергені анықталған.
Аудандық полиция бөлімінің «102» операторына белгісіз адам қоңырау шалып, Құлсары қаласының 3-шағынауданындағы балалардың ойын алаңында жаппай төбелес болып жатқанын хабарлаған.
Ювеналды полиция инспекторлары айтылған мекенжайға жедел жетіп, ешқандай төбелестің болмағанын анықтады.
«Ал, жалған хабар берген кәмелетке толмаған жасөспірім ұсталды. Оған қатысты ҚР Әкімшілік құқық бұзу кодексінің 438-бабына сәйкес, полицияны көрінеу жалған шақырғаны үшін әкімшілік хаттама толтырылды», -деп хабарлады департаменттің баспасөз қызметі.
Еске сала кетелік, бұған дейін Атырау облысында мектепке «бомба қойған» жігіт қамауға алынғанын хабарлаған болатынбыз.