Аттестациядан өтпеген атом энергиясын пайдалану қызметкерлеріне қайта тапсыру құқы берілмек

Аталған заң жобасын таныстырған ҚР Энергетика вице-министрі Сұңғат Есімхановтың айтуынша, «Тұрғындардың радиациялық қауіпсіздігі туралы» қолданыстағы заң 1998 жылы қабылданған. Сондықтан оның өзіндік ерекшеліктері бар.

«Біз қазір түрлі тұжырымда түсіндірілетін барлық мәселені, айталық »радиациялық қауіпсіздіктің», «радиациялық құрылғының» не екенін нақтылайтын боламыз», - деді ол.

Вице-министр халықтың радиациялық қауіпсіздігін қамтамасыз ету саласындағы мемлекеттік органдардың өкілеттіктерінің ара-жігін ажырату қоршаған ортаны және халықтың денсаулығын атом энергиясын пайдалану нысандарының зиянды әсерінен қорғау тиімділігін арттыруға ықпал ететіндігін айтты.

«Бұл мәселеде түрлі қайшылықтар болды. Әсіресе Денсаулық сақтау министрлігімен мәселелер туындады. Сонымен қатар қазір Экология, геология және табиғи ресурстар министрлігінің құрылуына байланысты экологиялық мәселелер туындайды. Қазір біз бұл мәселелерде нақты градация жүргіземіз. Атом энергиясын пайдалану нысандарында жұмыс істейтін қызметкерлердің қайтадан аттестациядан өтуі бөлігінде өзгерістер енгіземіз. Қолданыстағы заңнамада егер қызметкер аттестациядан өте алмаса онда оның жұмыстан шеттетілетіндігі, жұмыс істеуге құқы жоқтығы жазылған. Көптеген салада аттестацияны қайта тапсыруға құқық берілген. Сондықтан бұл жерде де қайта аттестациядан өтуге құқық беріледі», - деді Сұңғат Есімханов.