Астанадағы «Mega Silk Way» СОСО-да коронавирусқа қарсы вакцинация басталды

None
None
НҰР-СҰЛТАН. ҚазАқпарат – Елордадағы «Mega Silk Way» сауда, ойын-сауық орталығында коронавирусқа қарсы вакцинация басталды, деп хабарлайды ҚазАқпарат.

Вакцинаның бірінші компонентін сауда, ойын-сауық орталығының қызметкерлері, бутиктерді жалға алушылар, сатушылар және орталық қызметкерлері алды.

Бұдан басқа, қалада коронавирусқа қарсы вакциналау алдын ала жазылу арқылы медициналық-санитарлық көмек ұйымдарында, яғни емханаларда, отбасылық денсаулық орталықтарында, дәрігерлік амублаторияларда және өзге де нысандарда жүргізілуде.

Елордада егу пунктерінің саны 36-дан 100-ге дейін ұлғайтылды, ал олардың жұмыс кестесі сағат 08:00-ден 00:00-ге дейін ұзартылды. Вакцинаны алуға egov мобильдік қосымшасы арқылы немесе 109 нөмірі бойынша call-орталыққа қоңырау шалу арқылы жазылуға болады.

«Бүгін тестілік режимде СОСО қызметкерлерін егуді бастадық. Мұнда шамамен 100 адам бар. Вакцинациядан бұрын олардың бәрі дәрігерлердің міндетті медициналық тексеруінен өтті. Ал СОСО-да бригадалар кезекшілік етеді. Вакцинацияға рұқсат берілгендер егіледі», — деді Нұр-Сұлтан қаласы Қоғамдық денсаулық сақтау басқармасы басшысының орынбасары Әлия Рүстемова.

Сондай-ақ, ол СОСО-да қала тұрғындарын жаппай вакциналау қашан басталатынын айтты.

«Бүгін қалалық санитарлық дәрігердің қаулысы бойынша сауда, ойын-сауық орталығы келушілер үшін жабық. Сол себепті дүйсенбіде СОСО-да орналасқан егу орталығы тұрғындарды да, орталыққа келушілерді де вакциналауды бастайды», - деді Ә.Рүстемова.

Қазіргі уақытта елордада вакциналардың жеткілікті мөлшері бар. Сәуір айының соңына дейін Нұр-Сұлтанға 250 мыңнан астам доза келеді. Жалпы, әр апта сайын Денсаулық сақтау басқармасының қоймаларына «Спутник V» жаңа партиясы келіп түседі.

Бүгінгі таңда коронавирус инфекциясына қарсы 26 мыңнан астам адам екпе алды.
Қажет болған жағдайда халықты вакциналау пунктері бірқатар СОСО мен қонақүй кешендерінде ашылатын болады.


Соңғы жаңалықтар