«Астана Опера» қазақстандықтарды театрмен дос болуға шақырды
2022 жылғы 26 наурыз 23:24

«Астана Опера» қазақстандықтарды театрмен дос болуға шақырды

НҰР-СҰЛТАН. ҚазАқпарат - Бүгін «Астана Опера» театрында «Достар клубы» атты арнайы жобаның тұсаукесер рәсімі өтті. Салтанатты іс-шараға ҚР Мәдениет және спорт министрі Дәурен Абаев, Қазақстандағы дипломатиялық миссиялардың басшылары, көрнекті өнер өкілдері мен меценаттар қатысты.

«Бұл - өте қажет жоба. «Достар клубы» көрермендерді театрдың көпқырлы қызметімен егжей-тегжейлі таныстырып, оны одан әрі дамытып театрға жаңа көрермендерді тартатынына сенімдімін. Клуб қатысушыларын көптеген қызықты кездесулер, жаңалықтар мен бастамалар күтеді, өйткені «Астана Опера» талғампаз көрерменге эксклюзивті руһани дүние сыйлайды. Жобаға ұзақ өмір тілеймін, театр мен оның труппасы дамып, гүлдене берсін, көрермендерге керемет қойылымдар сыйласын», - деп түйіндеді Дәурен Абаев.

Іс-шараны ұйымдастырушылар «Достар клубына» барлық ниет білдірушілер, сондай-ақ коммерциялық және коммерциялық емес ұйымдар, оның ішінде шетелдік компаниялар мен кәсіпорындар қабылданатынын түсіндірді.

Клубқа мүшелік - бұл «Астана Операның» қызметіне, Астана мен елдің мәдени игілігін сақтауға және көбейтуге қосқан жеке үлесі.

Клуб мүшелері үшін арнайы театрлық іс-шаралар өткізіледі, клуб мүшелері «Астана Опера» өміріне белсенді қатыса алады, сахна сыртына экскурсия жасайды, артистер шығармашылық кештер өткізеді, театрдың бағдарламалары мен жобаларын іске асыруға жәрдемдеседі.

Театрдың достар клубына мүшелікті бүкіл театр маусымына қолданылатын арнайы пластикалық картамен растауға болады.

«Дос» санатына «Астана Операның» тұрақты қонақтары кіреді. Олар үшін клуб карталарының жалпы саны - 70 дана.

Екінші санатқа - «құрметті дос» кіреді, оған 50 карта қарастырылған.

Сонымен қатар, тағы 2 санат бар: «серіктес» және «демеуші», оған ұйымдар мен коммерциялық компаниялар кіреді.


Ұқсас жаңалықтар

Jańalyqtar

MURAǴAT