Әскери әуе күштері СУ-30СМ ұшақтарымен толықты
Ресей Федерациясымен жасалған келісім және Қазақстанның Қарулы күштерін қайта жарақтау бағдарламасы бойынша Әскери-әуе күштеріне көп функциялы Су-30СМ ұшқыр ұшақтары келді.
«Cу-30СМ ұшақтары әскерлерді және объектілерді әуе шабуылы соққысынан қорғану, әуедегі және жердегі нысананы анықтау мен жою мүмкіндігін айтарлықтай артырады. Солардың арқасында Қарулы күштердің әлеуеті артады», – деді Әуе қорғанысы күштерінің бас қолбасшысы генерал-лейтенант Нұрлан Орманбетов.
Cу-30СМ – бұл екі орынды көпмақсатты, барлық ауа-райында ұшатын, жоғары маневрлі 4++ жататын жойғыш ұшақ. Бұл ұшақта қазір Әскери-әуе күштеріндегі Су-27 және Миг-31 секілді екі түрлі әскери машинаның барлық функциясы бар.
Ұшақтарды Иркутск авиация зауытынан әкелу 2015 жылдан бері іске асырылып келеді. Бүгінгі күнге дейін көптеген авиациялық база осы жойғыш ұшақпен жарақталған.
Қарағанды авиация базасының ұшу және инженерлік-техникалық құрамы Талдықорған мен ұшақты дайындаған зауытта толық оқудан өтті. Олар ұшақты басқаруға, пайдалануға және осы тектес ұшақтарға қызмет көрсетуге тиісті рұқсат алды.
