22:59, 28 Наурыз 2020 | GMT +6
Алматыда коронавирустан тағы екі адам жазылып шықты
АЛМАТЫ. ҚазАқпарат – Алматыда коронавирустан жазылған тағы екі адам ауруханадан шығарылды, деп хабарлайды ҚазАқпарат тілшісі.
«Екі ер адам бүгін ересек жұқпалы аурулар ауруханасынан шығарылды. 1962 жылы туған азамат 13 наурызда Берлин-Минск-Алматы чартерлік рейсімен келген болатын. Екіншісі - 1995 жылы туған жігіт 15 наурызда Сеул-Алматы рейсімен келді», - деді қалалық Қоғамдық денсаулық сақтау басқармасының басшысы Тілеухан Әбілдаев.
Қазіргі таңда мегаполистен бес науқас сауығып шықты. Олардың біреуі 12 жастағы қыз бала.
Енді олардың барлығы медицина қызметкерлерінің бақылауында үйде 14 күндік карантинде болады.