Алматыда көктемгі су тасқынына дайындық пысықталды
Алматы қалалық Төтенше жағдайлар департаментінің баспасөз қызметінен мәлім еткендей, негізгі жаттығу Наурызбай және Алатау аудандарындағы 3 учаскеде, Қарғалы өзенінің жағасында жүргізілді. Онда өзен арналары мұз бен шөгінділерден тазартылды. Жүргізілген жұмыстардың нәтижесінде, су басу қаупі жойылды.
Жалпы, 7 шақырым өзен арналары тазартылып, 403 текше метр қар және қатты тұрмыстық қалдықтар шығарылды.
«Оқу жаттығуға 300 адам және 52 техника: соның ішінде, ҚР Ұлттық ұланның «Оңтүстік» өңірлік қолбасшылығынан 100 адам және 5 техника, қаланың азаматтық қорғау қызметтерінен 153 адам, 39 техника және ҚР ІІМ ТЖК аумақтық бөлімшелерінен 46 адам, 8 техника қатысты»,– деп хабарлады қалалық ТЖД-дан.
Жүйелі бақылауды ұйымдастыру, су тасқыны салдарын болдырмау және жою жөніндегі шараларды әзірлеу мақсатында 2019 жылы Төтенше жағдайлар департаменті жиі су басатын 26 учаскені есепке алды. Бүгінгі күні 9 учаскеде су басу қаупі жойылды, қалған 17 учаскеде жалпы ұзындығы 376 шақырым болатын арық желілерін тарту және қайта қалпына келтіру үшін жобалық-сметалық құжаттама әзірленуде.
Оқу-жаттығу барысында, Алматы қаласының ТЖД, ҚР Ұлттық ұланның аумақтық бөлімшелері, қаланың азаматтық қорғау қызметтері, көктем маусымында төтенше жағдайларды жоюға дайын екендіктерін көрсетті.