Алматыда биыл кем дегенде 50 мың жұмыс орнын ашу міндеті тұр - Мақсат Қиқымов

«Өткен жылы жұмыссыздық 5,3%-дан 5,1%-ға дейін төмендеді. Еңбек министрлігі белгілеген жоспар бойынша 51,7 мың, бір жылда 55,5 мың жаңа жұмыс орны құрылды. Жұмыссыздықты азайту бойынша жұмыстар жалғасатын болады», - деді ол.

Биылғы жылы 7 ұлттық жоба шеңберінде 13 267 жұмыс орнын құру жоспарлануда.

Жеке бастамалар аясында 3 әкімші 500 жұмыс орнын құрып, 20 жобаны іске асырады: Туризм басқармасы – 258, «Жасыл экономика» – 198, Спорт – 44.

Кәсіпкерлік субъектілері қаланың 8 ауданында 30 994 жұмыс орнын ашуды жоспарлап отыр:

Алатау ауданы – 3800, Алмалы ауданы – 4190, Әуезов ауданы – 4500, Бостандық ауданы – 4104, Жетісу ауданы – 3500, Медеу ауданы – 3700, Наурызбай ауданы – 3400, Түрксіб ауданы – 3800.

Жалпы, аталған шаралардың арқасында кем дегенде 50 мың жұмыс орнын құру міндеті қойылды.

Бұдан басқа, Алматы әкімі Бақытжан Сағынтаевтың тапсырмасы бойынша жастарды кәсіптік-техникалық даярлау және жұмыссыздарды қайта оқыту күшейтіліп, кейіннен жұмысқа орналастырылады.

Ол үшін жұмыссыздарды қысқа мерзімді оқыту бойынша оқу бағдарламалары қайта қаралады (мерзімі – 3 ай).

Кәсіпкерлікті дамыту жөніндегі Ұлттық жоспар аясында қосымша 3 ай мерзімге (кейіннен жұмысқа орналастыра отырып) 20 АЕК (61 260 теңге) төлемді субсидиялап, жұмыс берушілерде жұмыс орнында оқыту бойынша жаңа тетік іске қосылады.

«Биылғы жылдан бастап жастар практикасы бойынша жалақы 25-тен 30 АЕК-ке дейін (91 890 теңге) ұлғайтылды. Бұл жеткіліксіз екенін ескере отырып, әкімнің тапсырмасы бойынша жергілікті бюджеттен қосымша тағы 10 АЕК-ке төлемді ұлғайтамыз, осылайша жалақы 122,5 мың теңгені (40 АЕК) құрайды, оған біз 335,3 млн теңге бөлдік»,- деді Мақсат Қиқымов.

Алматы әкімінің орынбасары сондай-ақ, егер бұрын жастар тәжірибесі бойынша 6 айға жұмысқа орналастыру қарастырылған болса, қазір ұйым Ережелеріне өзгерістер енгізілуіне байланысты жолдама 1 жылға дейінгі мерзімге жүзеге асырылатынын хабарлады.

Биылғы жылдан бастап жұмыс істейтін мүгедек адамдарға әлеуметтік жұмыс орындарын субсидиялау мөлшері 63 мыңнан 92 мың теңгеге дейін ұлғайтылады (9 АЕК-ке немесе 28 мың теңгеге, 405 млн теңге бөлінді).

Мүгедектігі бар адамдар үшін әлеуметтік жұмыс орындарын ұйымдастыру Ережелері бойынша субсидия төлемі жұмыс беруші белгілеген жалақының 50% мөлшерінде көзделеді. Мүгедек адамдарды тартатын бизнеске және үкіметтік емес секторға жүктемені азайту үшін әкімнің тапсырмасы бойынша жергілікті бюджеттен жалақының 80%-ы немесе 92 мың теңге (91 890 теңге) субсидияланатын болады.