Алматы полициясы жалған нөмір таққан көліктерді анықтау үшін рейдке шықты

Алматы полициясы жол қозғалысы ережелерін өрескел бұзушыларды анықтау бойынша күшейтілген режимде жұмыс істеп жатыр.

«Осы күндері қалада рейд жүріп жатыр. Патрульдік полиция мен мамандандырылған батальонның жеке құрамы жалған нөмірлік белгілермен жүрген, мемлекеттік тіркеу нөмірлері жоқ, терезелерін қараңғылаған, сондай-ақ көліктерді заңсыз қайта жабдықтағандарды анықтап, ұстап жатыр. Сонымен қатар көлік құралдарын мас күйінде басқару фактілеріне ерекше назар аударылуда. Жүргізушілердің арасында жол қозғалысына қатысушылардың өмірі мен денсаулығына қауіп төндіретіндер әлі де азаяр емес», – деді Алматы қалалық Полиция департаменті бастығының бірінші орынбасары Нұрлан Алмасбеков.

Оның айтуынша, тәрітп сақшылары өткен тәулікте қала жолдарында мас күйінде көлік жүргізген бес жүргізуші ұстады. Олардың екеуі бұған дейін көлік басқару құқығынан айырылса да тағы мас күйінде көлік тізгініне қайта отырған.

« Бір жүргізуші жалған нөмірлік белгі қолданғаны үшін жауапқа тартылды. Сонымен қатар өткен тәулікте автокөлік терезелерін қараңғылаудың 18 фактісі, автокөлік құралдарын құжатсыз жүргізудің 23 фактісі, апаттық жағдай туындатудың 4 фактісі, қарсы жолаққа шығып кетудің 2 фактісі және т.б. құқық бұзушылықтар анықталған»,– деп атап өтті Нұрлан Алмасбеков.