Алматы облысының 37 тұрғыны армениялық көліктерін тіркеуге қойды

None
None
ТАЛДЫҚОРҒАН. ҚазАқпарат - Биыл Алматы облысының 37 тұрғыны мүмкіндікті сәтті пайдаланып, армениялық көліктерін тіркеуге қойған, - деп хабарлайды ҚазАқпарат тілшісі.

Алматы облысы Полиция департаментінің ақпаратына сәйкес, шетелдік көліктерді заңдастырудың бірегей мүмкіндігін еліміздің көптеген азаматы пайдаланған.

«Қазақстан Республикасы Үкіметінің 2021 жылғы 27 ақпандағы қаулысына сәйкес елімізге Армениядан әкелінген көліктерді тіркеуге қою мерзімі 2022 жылғы 1 наурызға дейінгі мерзімге ұзартылды. Шетелдік тіркеудегі көлігі бар тұрғындардан осы мүмкіндікті жібермей, тіркеуге тезірек қоюға шақырамын»,- деді Алматы облысы Полиция департаменті Әкімшілік полиция басқармасы Процессинг орталығының бастығы, полиция подполковнигі Нұрболат Алтаев.

Естеріңізге сала кетейік, Мемлекет Басшысының тапсырмасына сәйкес былтыр ҚР Үкіметі Армения елінен әкелінген көліктерді тіркеуге қою тәртібі мен мерзімін бекіткен болатын. Дегенмен, жаһанды жайлаған коронавирус індетіне байланысты мемлекеттік шекаралардың жабылуына және көліктерді сынақтан өткізу мекемелердің жұмысындағы өзгерістерге байланысты уақытша тіркеуге қою уақытына өзгертулер енгізіліп, ұзартылған болатын.


Соңғы жаңалықтар