Алматы облысында жоғалған жолаушылар аман-есен табылды
«Кербұлақ ауданындағы Сарыөзек-Көктал тас жолының 65 шақырымындағы Алтын-Емел асуында ауа райының қолайсыздығы салдарынан көліктері тоқтап қалған үш жолаушы өз беттерінше далаға шығып кеткен. Үш әйел адам 24 қараша кешкі сағат 21:00-дер шамасында көліктен шығып, жол-жөнекей машинаға мініп, Басши ауылына аман-есен жеткендері анықталды. Ал 3 жолаушыны 20 адам бүгін таңертеңгі сағат 8:30-ға дейін іздестірген. Қатты дауылдың салдарынан адасып кетуі мүмкін деген үш азаматша аман есен табылды», - деді Алматы облыстық Төтенше жағдайлар департаменті баспасөз қызметінің өкілі Азамат Жұртбаев.
Сондай-ақ, аталған ведомство өкілдері өткен тәулікте жол бойында қалған 9 жолаушы аман-есен құтқарылғанын жеткізді. Оқиға Қапал-Арасан тас жолының 20-шы шақырымында болған. 24 қараша күні түнгі сағат 21:00-дер шамасында қар құрсауында қалған екі көліктің жолаушыларын құтқарушылар эвакуациялап, Қапал-Арасан ауылына жеткізген.
Алматы облыстық Төтенше жағдайлар департаменті баспасөз қызметінің мәліметінше, қазіргі таңда Алматы облысында барлық автокөліктер үшін жолдар ашық.