Алматы облысында жазғы дөңгелекпен жүрген жүргізуші иен далада қар құрсауында қалды
«Топар ауылының учаскелік полиция инспекторы Серік Байбосынов пен Топар ауылының учаскелік полиция инспекторы Бауыржан Амангелді «Мал ұрлығы» жедел алдын алу іс-шарасы барысында шалғай орналасқан қыстақтарды аралау кезінде жаңа жауған қарға батып, жүре алмай қалған FORD көлігін алыстан байқап қалған. Жақын келгенде көлікте жүргізуші мен егде жастағы қарт ананың бар екені анықталды. Сол жерде тұрғындарға көмек көрсетілді»,- деді Балқаш ауданы ПБ бастығының орынбасары полиция подполковнигі Нұргелді Абиров.
Өз кезегінде күрті қарды күрей алмай, жол азабын шеккен жолаушылар көмек көрсеткен полицейлерге шексіз алғысын білдірді.
Жүргізуші енді көлігін қысқы мезгілге мұқият дайындайтынын айтты.
Балқаш ауданының тәртіп сақшылары әлеуметтік желі арқылы аудан тұрғындары мен қонақтарын көліктеріне қысқы дөңгелек салып, техникалық тексеруден өткізуге шақырды. Өйткені, қысқы жолдағы болмашы ғана қателік орны толмас қасіретке әкелуі мүмкін екенін ескертеді.
