Ақтөбенің аудандарында коронавирус инфекциясын жұқтырғандар көбейді

Соңғы тәулікте Ақтөбе облысында 26 адам коронавирус инфекциясын жұқтырды. Қазір аудандарда көбейіп барады. Мәселен, Алға мен Ырғыз, Темір аудандарында -3, Байғанинде - 1, Қарғалыда - 2, Мәртөкте - 16, Мұғалжарда - 15, Шалқарда - 24 адамға жетті. Бұған дейін Шалқар қаласында ерекше шектеу шарасы енгізілгенін хабарлаған болатынбыз.

«Соңғы тәулікте вирус жұқтырған 19 адам - Ақтөбе қаласынан. Шалқар ауданында ‒ 2 әйел, Мұғалжар ауданында ‒ 3 адам, Ырғыз және Мәртөк аудандарында бір адамнан тіркелген. 19 пациент ЖРВИ симптомдарымен медициналық көмекке жүгінген. Ал 4 науқас бұған дейін коронавирус анықталған адамдармен қарым-қатынаста болған. 2 адам эпидқадағалау, 1 адам профилактикалық мақсатта қаралған», - деп хабарлады облыстық тауарлар мен көрсетілетін қызметтер сапасы мен қауіпсіздігін бақылау департаментінің баспасөз қызметі.

Барлық науқас жұқпалы аурулар стационарына жатқызылған. Олармен қарым-қатынаста болған адамдар медициналық бақылауға алынды

Айта кетейік, Ақтөбе облысында коронавирус инфекциясымен жалпы 427 адам тіркелген, оның 244-і жазылып шыққан.