Ақтөбеде цистернадан төгілген жанармай 945 шаршы метр аумаққа жайылған
Ақтөбе облысы, Шалқар ауданы Ұлпан станциясында 22 вагоны рельстен шығып кетті. Жедел түрде оқиға орнына «ҚТЖ» ҰК АҚ-нан 65 қызметкер және 2 қалпына келтіру, 2 өрт сөндіру пойызы, төтенше жағдайлар департаментінен 9 қызметкер мен 3 бірлік техника жұмылдырылды. Рельстен шыққан 13 цистернаның жетеуіндегі бензин, дизельді отын төгілді. Осы оқиғаға байланысты экологтар да тергеуді бастады.
«Ақтөбе облыстық экология департаментінің мамандары оқиға орнына барды. Тексеру кезінде дизельді отын мен бензиннің төгілгені анықталды. Ластанған жер көлемі өлшенді. Есеп бойынша 945 шаршы метр аумаққа жанар-жағармай төгілген. Топырақ сынамасы да алынды. Қазіргі уақытта қалпына келтіру жұмысы басталды. Жоспардан тыс тексерудің қорытындысы қосымша хабарланады», -деді облыстық экология департаментінің баспасөз қызметі.