Ақтөбе облысының әкімі шошқа фермасына қатысты пікір білдірді
«Бестамақта болған жағдайға байланысты барлық құзырлы мекемеге тиісті тапсырма бердім. Қазір осыған қатысты арнайы комиссия құрылды. Олар жағдайды жіті тексеретін болады. Сондай-ақ, осы салаға жауапты орынбасарым мен эколог мамандар брифинг берді. Комиссия тексерісті аяқтаған соң, барлығын ашық баяндайтын болады. Арандатушылыққа жол бермейміз. Біздің басты жетістігіміз – береке мен бірлік, тыныштық. Ауызбіршілік танытайық, әбден істің байыбына барып, сабыр сақтап, құзырлы органдардың тексеру нәтижесін күтейік», - деп жазды облыс әкімі Оңдасын Оразалин.
Еске салсақ, Ақтөбе облысы Алға ауданының тұрғындары шошқа фермасындағы біраз кемшілікті атады. Олар ішек-қарынды жою, өлексені залалсыздандыру жұмысы жүргізілмейтінін, көму кезінде біраз талаптың сақталмайтынын айтты. Қазір мұнда шошқа сою жұмысы тоқтап тұр. Экологтар да кемшіліктің тіркелгенін растады.