Ақтауда заманауи Бокс орталығы пайдалануға беріледі

Жоспар бойынша Бокс орталығы тамыз айында қолданысқа берілмек. Мұнда спорттың 6 түрімен айналысуға мүмкіндік болады. Олар: қазақ күресі, бокс, грек-рим күресі, каратэ, таеквондо және ауыр атлетика. Спорт кешеннің сыйымдылығы 20 мың шаршы метр, жанында 99 адамға арналған қонақүй бар. Жүзу бассейні, баскетбол, волейбол, футбол стадиондары бар.

Сонымен қатар, Маңғыстау облысында «Жұмыспен қамтудың жол картасы» аясында бірнеше спорт нысаны жөндеуден өткізілмек. Олардың 3-еуі Ақтау қаласында, 1-еуі Жаңаөзен каласында, үшеуі Маңғыстау ауданында орналасқан.

«Қыркүйек айында спорт түрлерінен ҚР Тұңғыш Президенті – Елбасының тестілерін өткізуді жоспарлап отырмыз. Бұл – облыс дәрежесінде осы жылдың ең ауқымды іс-шараларының бірі болмақ. Облыс бойынша барлық тұрғындарды Президенттік тестілеуге шақырамын. Жеңімпаздар мен жүлдегерлер марапатталатын болады», - деді облыстық Дене шынықтыру және спорт басқармасы басшысының орынбасары Қанат Жұмабаев.