Ақмолада сынама алынған 1550 өнімнің 7,5 пайызы техникалық регламенттерге сәйкес келмейді

Ведомствоның мәліметінше, 2022 жылдың бес айында 1550 өнім үлгісі сатып алынды, оның ішінде 117 сынама (7,5%) техникалық регламенттердің талаптарына сәйкес келмеді. Мәселен, тамақ өнімдерінің 915 үлгісінің 66-ы (7,2%), азық-түлік емес өнімдердің 638 үлгісінің 51-і (8%).

«Халық тұтынатын тауарлар арасында Кеден одағының техникалық регламенттерінің талаптарына сәйкес келмеу бойынша жетекші орынды ет өнімдері - 14,8%, құс еті және құс өнімдері - 13%, балық өнімдері - 11,3%, жарма өнімдері - 7,1%, сүт өнімдері 6,5% алады. Азық-түлік емес топтардан жеңіл өнеркәсіп өнімдері - 42,2%, балалар ойыншықтары - 28,7%, балалар заттары - 11,1% және парфюмерлік-косметикалық өнімдер - 1,3%», - деп атап өтті ведомстводан.

Сәйкессіздіктің 75%-дан астамы өнімді таңбалауға келеді, микробиологиялық көрсеткіштер бойынша - 7,7%, физика-химиялық көрсеткіштер бойынша - 9,4%, тұтынушыны алдау - 6%.

«Салыстырмалы талдау облыстың ішкі нарығында айналыста жүрген, анықталған сәйкес келмейтін өнімнің ең көп пайызы импорттық өнімнің үлесіне тиесілі екенін көрсетеді – 79,6%. Бұл жеткізушілер мен сатушылардың сапасыз және қауіпсіз емес өнімді сәйкестік құжаттарынсыз, сондай-ақ тауарға ілеспе құжаттарсыз әкелгенін айғақтайды. Кәсіпкерлік субъектілеріне қатысты анықталған бұзушылықтардың барлық деректері бойынша Қазақстан Республикасының халықтың санитарлық-эпидемиологиялық саламаттылығы саласындағы заңнамасының талаптарын бұзушылықтарды жою туралы 63 нұсқама берілді», - деп толықтырды ведомстводан.

Айта кетсек, бұдан бұрын Ақмола облысында тексерілген 85 су қоймасының 78-і шомылуға жарамды екені жарияланды .