АЭФ: Әлихан Бөкейхан, Әл-Фараби, Жүсіп Баласағұнның мемлекеттік басқаруды ілгерілетудегі үлесі туралы айтылды

«Марапат және құрмет: ХХІ ғасырда мемлекеттік қызметшілерді ынталандыру» атты сессияны Астана мемлекеттік қызмет хабы БҰҰ Даму Бағдарламасы және Назарбаев Университетімен бірге АЭФ аясында ұйымдастырды.

Сессияның ашылуында Астана хабы басқарушы комитет төрағасы Әлихан Байменов «адамзаттың ортақ өзекті мәселерін шешуде мемлекеттік басқару сапасының орны ерекше» екендігіне, ол «тек мемлекеттік қызметшілердің білімі және білігімен ғана емес, ынтасымен де анықталатындығына» тоқталды.

Әлихан Байменовтің айтуынша, «мемлекеттік қызметшілердің жеке бастың қамын емес, мемлекеттің, қоғамның ортақ мәселерерін шешуге бейім болуы, елге қызмет жасауға ниеті ел дамуында маңызды рөл атқарады. Осыны түсінген Алаш Орда үкіметінің басшысы Әлихан Бөкейханов осыдан 100 жыл бұрын «ұлтқа қызмет - мінезден» деген».

Астана хабы жетекшісі өз сөзінде, мемлекеттік қызметкерге қажет 12 қасиетті ұлы бабамыз әрі ойшыл Әл Фараби 11 ғасыр бұрын анықтап бергенін, оның ішінде адалдық пен мемлекет ісіне берілгендік шешуші құндылық ретінде көрсетілгенін жеткізді. Осы кезеңде Орталық Азиядан шыққан философ Жүсіп Баласағұн 15 лауазымдағы мемлекеттік қызметкерлер үшін маңызды кәсіби біліктілік ретінде абырой мен ынтаны ерекше атаған.

Жиын барысында он бестен астам елдің, соның ішінде Грузия, Украина, Қазақстан, Қырғызстан, Черногорияның уәкілетті органдар басшылары мен өкілдері мемлекеттік қызметшіледі ынталандыру жолдарын, еңбекақы төлеу жүйесін реформалау, олардың қызмет тиімділігін бағалау бойынша тәжірибелерімен бөлісті.