42500 теңге әлеуметтік төлем қанша адамға тағайындалды

«216 922 адамға ТЖ кезеңінде табысынан айырылуына байланысты Мемлекеттік әлеуметтік сақтандыру қорынан әлеуметтік төлем тағайындалды», - деді Мемлекеттік әлеуметтік сақтандыру қорынан.

Мәлім етілгендей, 8 сәуір сағат 14.00-дегі жағдай бойынша, 42500 теңгеден әлеуметтік төлем алу үшін 1 млн 688 мың 131 азаматтан барлығы 2 млн 755 мың 866 өтініш түскен. Яғни 1 млн 67 мың 735 өтініш қайталанып жіберілген.

«Өтініштерді қарау мерзімінің ұлғаюына жол бермеу мақсатында азаматтардан өтінішті бір рет қана жіберуді сұраймыз», - деді қордан.

Азаматтардың жеке мәліметтерін тексеру және өтінішті қарау мерзімі 3 жұмыс күнін құрайды. МӘСҚ-та төлем жасау туралы шешім қабылданғаннан кейін өтініш берушіге SMS-хабарлама келеді. Кейіннен өтініш берушінің деректері «Азаматтарға арналған үкімет» мемлекеттік корпорациясы» КЕАҚ-ға жіберіледі. Ол оны екінші деңгейдегі банктерге төлем жүргізу үшін жібереді.

Әлеуметтік төлем алуға өтінімді eGov порталы, 42500.enbek.kz вебсайты және Telegram-бот арқылы беруге болады.

Еске салайық, елде төтенше жағдайдың жариялануына байланысты табысынан айырылған келесі санаттағы азаматтар айына 42 500 теңге мөлшерінде әлеуметтік төлем ала алады:

–шағын және орта кәсіпкерлік субъектілерінің жалақысы сақталмайтын демалыстағы қызметкерлеріне;

– карантин енгізілген елді мекендердегі ірі кәсіпкерлік субъектілерінің жалақысы сақталмайтын демалыстағы қызметкерлеріне;

– мемлекеттік мекемелерді қоспағанда, коммерциялық емес заңды тұлғалардың жалақысы сақталмайтын демалыстағы қызметкерлеріне;

– жеке кәсіпкерлерге;

– жеке практикамен айналысатын адамдарға (нотариус, жеке сот орындаушысы, адвокат, кәсіби медиатор);

– бірыңғай жиынтық төлемді төлеушілер болып табылатын жеке тұлғаларға;

– нысанасы жұмыстарды орындау (қызметтер көрсету) болып табылатын азаматтық-құқықтық сипаттағы (бұдан әрі – АҚС) шарттар бойынша табыс табатын, салық агенттері олар үшін міндетті зейнетақы жарналарын аударған адамдарға жүзеге асырылады.