11 мың жұмыс орнын ашатын 38 жоба іске асырылмақ - ШҚО

Өңірде 2025 жылға дейінгі кәсіпкерлікті қолдау картасына 11,3 мың жаңа жұмыс орындарын құратын 38 жоба енгізілді. Бұл туралы облыс әкімі Даниал Ахметов халыққа есеп беруінде айтты.

«2020 жылы 37,5 млрд теңгеге 5 жоба іске асырылды. Оның ішінде барынша маңыздысы жылына 200 тонна уран өнімділігімен АЭС арналған жылу бөлетін құрамалар шығаратын зауыттың құрылысы болды. Биыл 3 мыңнан астам жұмыс орнын ашуға мүмкіндік беретін, құны 498 млрд теңгені құрайтын 14 инвестициялық жобаны жүзеге асыру жоспарланып отыр», - деді аймақ басшысы.

Тарбағатай ауданында қуаттылығы жылына 25 млн тоннаға дейін кен өндіретін Қызылқайың кен учаскесінде кен байыту комбинатын салу жоспарланған. «Қазмырыш» ЖШС-мен бірлесіп электролиттік тәсілмен мырышты алу бойынша зерттеу желісі құрылды.

«Өңірде шағын және орта бизнеске басты назар аударылуда. 2020 жылы ШОБ-тан бюджетке төлемдер түсімі 119%-ға артып, 14,1 млрд теңгені құрады. «Бизнестің жол картасы-2025» мемлекеттік бағдарламасы аясында облыс субсидияланған жобалар саны бойынша 3-ші орында тұр. «Ақ ниет» жеңілдетілген несиелендірудің өңірлік бағдарламасы шеңберінде барлығы 7,2 млрд теңгеге 154 жоба қаржыландырылды», - деді Даниал Ахметов.