10 мыңға жуық жамбылдық КВИ-ге қарсы вакцинаның екінші компонентін қабылдады

None
None
ТАРАЗ. ҚазАқпарат – COVID-19 жұқтырғандар санының артуына байланысты Жамбыл облысының әкімі Бердібек Сапарбаевтың төрағалығымен коронавирустық инфекцияның таралуына қарсы күрес жөніндегі штабтың кезекті отырысы өтті, деп хабарлайды ҚазАқпарат тілшісі.

Өткен тәулікте талдама қорытындысы 57 адамда оң нәтиже көрсетіп, өсім 0,7 пайызды құрады. Ең көп жағдай анықталғандар – әдеттегідей Тараз қаласы, Қордай және Байзақ аудандары. Облыс орталығы «қызыл» аймақта десек, шаһардағы апталық өсім 304 науқасқа жетіп, 8,7 пайызды құраған. Қордайда бұл көрсеткіш – 6,2 пайызға айналып отыр. Ал, республикалық көрсеткіш 5,6 пайыздан аспайды.

Денсаулық сақтау басқармасының басшысы Әсет Қалиевтің айтуынша, 27 сәуірдегі жағдай бойынша инфекциялық стационарда 897 адам ем алуда (төсек-орындардың толу жүктемесі – 36%), оның 54-і жан сақтау бөлімінде. Медициналық мекемелердің материалдық-техникалық жабдықталуы мен дәрі-дәрмектермен қамтылуы бойынша ешқандай мәселе жоқ.

Облыста 37 егу пункті жұмыс істеуде. 36,7 мың жамбылдық вакцинаның бірінші компонентін, 9,9 мың жамбылдық екінші компонентін қабылдаған. Мойынқұм, Шу, Меркі аудандарында және Тараз қалалық №9 емханада вакцинация әлсіз қарқынмен жүруде. Сәуір айының соңына дейін тағы 49,9 мың адамға екпе егілуі керек.

Санитарлық-эпидемиологиялық бақылау департаментінің басшысы Байділдә Шыналиев қазіргі таңда қосымша шектеулер енгізу туралы құжат әзірленіп жатқанын жеткізді. Оның айтуынша, жаңа шаралар базарлардың, облысаралық автобус қатынасы мен басқа да сегменттердің қызметіне әсер етеді.

Өз кезегінде облыс әкімінің орынбасары Алмас Мәдиев Аshyq жобасының әлсіз іске асырылып жатқанына назар аудартты. Ол бойынша Тараздағы тек 39 кәсіпорын ғана жұмыс істеуде, ал аудандарда бұл тәжірибе мүлдем таратылмаған.

«Төтенше жағдайлар департаменті мониторингтік топтардың жұмысына ешқандай көмек көрсетіп отырған жоқ. Олармен тұрақты байланыста болу үшін ТЖД бастығы шұғыл мәселелерді шешу бойынша өз орынбасарын бекітуі қажет. Тұрғындар арасында санитарлық нормаларды қатаң сақтау қажеттілігі туралы түсіндіру жұмыстарының ауқымын кеңейту аса маңызды. Қоғамдық көлік пен базарларға айрықша назар аудару керек. Мектеп оқушылары мен мұғалімдер арасындағы инфекцияның таралуына бақылауды назарға алыңыздар», - деді Бердібек Сапарбаев.


Соңғы жаңалықтар