1 қарашаға дейін балық шаруашылығын дамытудың өңірлік бағдарламалары әзірленеді
«Мемлекет басшысы балық өсіру саласына ерекше назар аударды. Осы саланың әлеуеті айтарлықтай зор. Бұл туралы жақында өткен Үкімет отырысында жан-жақты баяндадым. Асқар Ұзақбайұлы, Сіздің тапсырмаңызды орындау үшін 1 қарашаға дейін әкімдіктермен бірлесіп балық шаруашылығын дамытудың өңірлік бағдарламалары әзірленетін болады. Өңірлік индикаторлар анықталады. Біз өткен аптада әкімдіктердің, ғылыми ұйымдардың және бизнестің қатысуымен тиісті жиналыс өткіздік. Бұл ретте, облыс әкімдерінен өңірлік бағдарламаларды әзірлеуге жауапты орынбасарларын белгілеуді сұраймыз», - деді министр.
Сонымен қатар ол орман шаруашылығы саласында 2030 жылға қарай орманшылық үлесін ағымдағы 4,7 пайыздан 5 пайызға дейін ұлғайту жоспарланып отырғанын айтты.
«5 жыл ішінде орман қорында 2,0 млрд және елді мекендерде 15 млн ағаш отырғызылады. Елорданың айналасындағы жасыл белдеу 2023 жылға қарай ағымдағы 87,8 мың гектардан 100 гектарға жетеді. Осыған байланысты әкімдіктер мемлекеттік орман қоры бойынша және әрбір елді мекенде ағаштардың отырғызу көлемін анықтауы қажет», - деді Мағзұм Мырзағалиев.