عالىمدار وتاندىق QazCovid-in ۆاكتسيناسىن ازىرلەۋ تەحنولوگياسى تۋرالى ايتىپ بەردى

None
None
نۇر-سۇلتان. قازاقپارات - وتاندىق QazCovid-in ۆاكتسيناسىن ازىرلەۋ بارىسىندا جىلدار بويى جاقسى ناتيجە بەرىپ كەلگەن تەحنولوگيا قولدانىلدى.

ۆاكتسينانىڭ بارلىق قۇرامداس بولىگى باسقا دا ۆاكتسينالاردى ازىرلەۋ كەزىندە پايدالانىلىپ كەلەدى، سوندىقتان سەنىمدى كومپونەنتتەردەن تۇرادى، دەپ حابارلايدى ق ر ءبىلىم جانە عىلىم مينيسترلىگىنىڭ باسپا ءسوز قىزمەتى.

يناكتيۆتى ۆاكتسينانىڭ پلاتفورماسى قاۋىپسىز بولىپ تابىلادى. حالىقتىڭ كوپشىلىگى ۆاكتسينانىڭ قۇرامىنداعى كومپونەنتتەردى باسقا دا ۆاكتسينالار ارقىلى بۇعان دەيىن دە قابىلداعان.

QazCovid-in پرەپاراتىن ازىرلەۋ بارىسىندا پايدالانىلعان جالعىز جاڭا كومپونەنت - بەلسەندى ەمەس ۆيرۋس.

«يناكتيۆتى ۆاكتسينانى دايىنداۋ تەحنولوگياسى قاراپايىم. ول باسقا ۆاكتسينالارعا قاراعاندا قاۋىپسىز ءارى ءتيىمدى اسەر ەتەدى. ۆاكتسينانى ەگۋ ناتيجەسىندە مىقتى يممۋنيتەت قالىپتاسادى. مىسالى، اۋىرىپ، كەيىن ساۋىققان ادامدا پايدا بولاتىن يممۋنيتەتپەن سالىستىرۋعا بولادى. يناكتيۆتى ۆاكتسينانى دايىنداۋ ءۇشىن پايدالانىلعان كومپونەنتتەردىڭ باسىم بولىگى ونداعان جىلدار بويى قولدانىستا ءارى ولاردىڭ زيانى بولماعان. سوندىقتان ءبىز QazCovid-in ازىرلەۋ ءۇشىن ۆاكتسينانىڭ يناكتيۆتى ءتۇرىن تاڭدادىق»، - دەدى قازاقستان رەسپۋبليكاسى ءبىلىم جانە عىلىم مينيسترلىگىنىڭ عىلىم كوميتەتىنە قاراستى بيولوگيالىق قاۋىپسىزدىك عىلىمي-زەرتتەۋ ينستيتۋتىنىڭ جەتەكشى عالىمى، ۆيرۋسولوگ، دوكتور، پروفەسسور لەسپەك كۇتىمبەتوۆ.

بۇعان دەيىن ۆاكتسينانى ازىرلەگەن عالىمدار، ءبىلىم جانە عىلىم ءمينيسترى اسحات ايماعامبەتوۆ، قازاقستان رەسپۋبليكاسى پرەزيدەنتىنىڭ كومەكشىسى ەرلان كارين، جامبىل وبلىسىنىڭ اكىمى بەردىبەك ساپاربايەۆ جانە اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ رەكتورى تالعات نۇرعوجين كلينيكالىق زەرتتەۋلەردەن تىس، ەرىكتى تۇردە وتاندىق ۆاكتسينانى سالدىرعان بولاتىن.

سوڭعى جاڭالىقتار