داۋرەن ابايەۆ «Kazakh Tourism» ا ق الدىندا تۇرعان مىندەتتەردى اتاپ ءوتتى
مينيسترلىكتىڭ باسپا ءسوز قىزمەتىنەن ءمالىم ەتكەندەي، كومپانيا ءتوراعاسى تالعات امانبايەۆ ۇيىم جۇمىسىنىڭ نەگىزگى باعىتى، تۋريزم سالاسىن دامىتۋدىڭ اسپەكتىلەرى جانە بولاشاق جوسپارلار تۋرالى ايتىپ بەردى.
كەزدەسۋدە داۋرەن ابايەۆ ەلىمىزدىڭ رەكرەاتسيالىق، تۋريستىك الەۋەتىن ارتتىرۋ ىسىندە كومپانياعا ەرەكشە جاۋاپكەرشىلىك جۇكتەلەتىنىن اتاپ ءوتتى.
«ءبىزدىڭ ماقساتىمىز - الەمگە قازاقستاننىڭ كورىكتى جەرلەرىن عانا كورسەتۋ ەمەس ەكەندىگىن ءتۇسىنۋىمىز قاجەت. سونىمەن قاتار ءبىز حالىقارالىق ينۆەستورلارمەن ىنتىماقتاسۋعا، ينفراقۇرىلىمدى دامىتۋعا جانە قازاقستان تۋرالى تولىعىراق بىلگىسى كەلەتىن بارلىق ادامدار ءۇشىن ءتيىستى جاعداي جاسايتىن، ءوز مىندەتتەمەلەرىن قاتاڭ ورىنداۋعا دايىن اشىق مەملەكەتتى ۇسىنۋعا ءتيىسپىز. بۇل ەل ەكونوميكاسىنا تۋريستىك سالانىڭ ۇلەسىن ارتتىرۋعا جانە ونىڭ شەتەلدەگى وڭ ءيميدجىن نىعايتۋعا مۇمكىندىك بەرەدى»، - دەدى داۋرەن ابايەۆ.
سونداي-اق مينيستر بۇگىندە مەملەكەت تۋريستىك باعىتتاردىڭ ينفراقۇرىلىمىن ساپالى جاڭارتۋعا ەلەۋلى ينۆەستيتسيالار سالىپ جاتقانىن، ەلگە تۋريستەردى تارتۋ ءۇشىن، قازاقستاننىڭ تۋريستىك سالاسىن دامىتۋعا قاراجات سالۋعا دايىن ينۆەستورلار ءۇشىن ءتۇرلى جەڭىلدىكتەر مەن پرەفەرەنتسيالار ۇسىنىلىپ وتىرعانىن ايتتى.
ءسوز سوڭىندا داۋرەن ابايەۆ تۋريزم سالاسى مەن Kazakh Tourism كومپانياسىنىڭ الدىندا تۇرعان ءبىرقاتار مىندەتتەردى اتاپ ءوتتى.