ديماش بيىلعى Junior Eurovision بايقاۋىنا قاتىساتىن قاراقات باشانوۆامەن كەزدەستى

ەسكە سالا كەتەيىك، ءبىز بۇعان دەيىن قاراقات باشانوۆانىڭ Junior Eurovision بايقاۋىنا قاتىساتىنىن جازعان بولاتىنبىز. حالىقارالىق ءان سايىسى 29- قاراشا، سەنبى كۇنى ۆارشاۆادا وتەدى.

پاندەمياعا بايلانىستى تىكەلەي ەفير كەزىندە شوۋ جۇرگىزۋشىلەرى پولشادا بولادى. ال قاتىسۋشىلار ءوز ەلدەرىنەن نومىرلەردى بەينەبايلانىس ارقىلى ۇسىنادى دەپ شەشىلگەن.

جاۋاپتى سىن الدىندا قاراقات ءىرى حالىقارالىق بايقاۋلاردىڭ جەڭىمپازى، تاجىريبەلى ءانشى ديماش قۇدايبەرگەنوۆپەن كەزدەستى.

جاس ونەرپازبەن الەمگە ايگىلى ءانشى 2019-جىلدان بەرى تانىس. ول كەزدە ديماشتىڭ تۋعان قالاسى اقتوبەدە Baqytty Bala بايقاۋى ءوتىپ، قاراقات ءۇشىنشى ورىن يەلەنگەن بولاتىن. بۇگىنگى كەزدەسۋ نۇر-سۇلتانداعى ورتالىق كونسەرت زالىندا بولدى. ديماش قاراقاتقا قولداۋ ءبىلدىرىپ، اكەسىنە ارنالعان «Forever» ءانىن تاماشالادى.

«سەنىڭ بويىڭداعى تالانت مەنى تەبىرەنتتى. ول مىندەتتى تۇردە باسقالاردى دا تاڭ قالدىراتىنىنا سەنىمدىمىن»، - دەپ جىگەرلەندىرە ءتۇستى.

ديماش ءوز تاجىريبەسىن ءبولىسىپ، كەڭەس بەردى. نومەردى ورىنداۋدا ۆوكالدان بولەك ساحنالىق شەبەرلىك قاجەت.

«جەڭىسكە جەتۋ ءۇشىن جاقسى كوڭىل-كۇي دە ماڭىزدى»، - دەپ اقىلىن ايتتى.

قاراقات ماڭىزدى سىن الدىندا ديماشتىڭ ءوزى دايىندىققا كەلىپ، قاتىسقانىنا قاتتى قۋاندى.

كەزدەسۋدەن شابىت العان ونەرپاز سۇيىكتى انشىسىنە قولداۋ بىلدىرگەنى ءۇشىن العىس ايتىپ، لايىقتى ونەر كورسەتۋگە كۇش سالاتىنىن جەتكىزدى.

قاراقاتقا ديماشتىڭ قارىنداسى راۋشان دا ساتتىلىك تىلەدى. جاس ونەرپازعا بالالار ەۆروۆەدەنيەسىنە قاتىسۋعا راۋشان ۇسىنىس ايتقان بولاتىن.

ەستەرىڭىزگە سالا كەتەيىك، قاراقات - Junior Eurovision بايقاۋىنا قازاقستان اتىنان قاتىسىپ وتىرعان ءۇشىنشى ونەرپاز. بۇعان دەيىن دانەليا تولەشوۆا (2018-جىلى) باق سىناپ، التىنشى ورىنعا يە بولدى. وتكەن جىلى بۇل كونكۋرستىڭ ەكىنشى ورنىن ەرجان ماكسيم جەڭىپ الدى.