EXPO-2020 Dubai: قازاقستاندىق وپەرا ءانشىسى ماريا مۋدرياكتىڭ دۋبايدا كونسەرتى وتەدى
«مەن ميلاندا 18 جىلداي تۇرىپ جاتىرمىن. باستاپقىدا وندا قازاقستاندىقتار مۇلدەم از بولدى. قازىر ميلاندا تۇراتىن جەرلەستەرىمىزدىڭ قاتارى كوبەيىپ كەلەدى، كەيبىرىمەن جاقسى ارالاسامىن. ولاردىڭ قاتارىندا ءوزىمنىڭ جەرلەسىم - پاۆلودارلىقتار دا بار. شىنى كەرەك، بوس ۋاقىت وتە از، ءجيى كەزدەسىپ تۇرۋعا مۇمكىندىك بولماي جاتادى. ۇنەمى كونسەرت، دايىندىق تاعى باسقا. بۇگىندە شەتەلدە ونىڭ ىشىندە يتاليادا دا قازاقستاندى كەڭىنەن تانيدى. مەن قازاقستاننانمىن دەپ ماقتانىشپەن ايتامىن. شەتەلدىكتەر ەلوردادا وتكەن ەكسپو كورمەسى تۋرالى ءجيى ايتىپ جاتادى»، - دەدى ماريا مۋدرياك تىلشىلەردىڭ سۇراعىنا جاۋاپ بەرە تۇرا.
ونەر جۇلدىزىنىڭ ايتۋىنشا، ەلىمىزدىڭ شەتەلدە كەڭىنەن تانىلۋى تاۋەلسىزدىكتىڭ جەمىسى.
«ەرتەڭگى ەلورداداعى كونسەرتىمنەن كەيىن دۋبايعا ۇشامىن. وندا EXPO-2020 Dubai حالىقارالىق كورمە اياسىندا قازاقستاننىڭ اتىنان كونسەرت وتكىزەمىن. سونداي-اق، وسكەمەندە كونسەرتىم جوسپارلانىپ وتىر. سودان سوڭ ميلانعا ۇشىپ بەلگيا كورولدىگى تەاترىنىڭ قويىلىمىنا دايىندىق باستالادى»، - دەيدى ول.
بۇعان دەيىن حابارلاعانىمىزداي، ەرتەڭ ەلوردادا تانىمال وپەرا ءانشىسى ماريا مۋدرياكتىڭ كونسەرتى وتەدى.