ەلوردادا COVID-19 دياگنوستيكاسى بويىنشا ءموبيلدى سكرينينگ ىسكە قوسىلدى

None
None
نۇر- سۇلتان. قازاقپارات - ەندى اۆتواۋەسقويلار مەن جولاۋشىلار كوروناۆيرۋستىق ينفەكتسياعا جىلجىمالى كولىكتە وتىرىپ- اق تەست تاپسىرا الادى، دەپ حابارلايدى قازاقپارات ءتىلشىسى.

«№2 كوپبەيىندى قالالىق اۋرۋحانا» م ك ك بازاسىندا قىسقا مەرزىمدە سكرينينگ جۇرگىزۋگە مۇمكىندىك بەرەتىن قاۋىپسىز جۇيە جۇمىس ىستەي باستايدى. ءموبيلدى ورتالىقتىڭ قۋاتى كۇنىنە 100 دەن استام تەستى قۇرايدى. ءبىر ادامعا پروتسەستىڭ ۇزاقتىعىنا 3-5 مينۋت كەتۋى مۇمكىن، بۇل ءداستۇرلى سكرينينگكە جۇمسالاتىن پروتسەسىنىڭ ۇشتەن ءبىر بولىگى.

«بۇل كوروناۆيرۋستىڭ الدىن الۋ ءۇشىن جاسالعان جوبا. پيلوتتىق رەجيمدە جۇمىس ىستەپ كوردىك. ءبىر اپتا ىشىندە 700 گە جۋىق كولىك جۇرگىزۋشىسى تەست تاپسىردى. باعاسى - 10 مىڭ تەڭگە. وسى جەردە تاپسىرعان تەست ناتيجەسى 6-7 ساعاتتا بەلگىلى بولادى. ناۋقاس ونى ءبىر تاۋلىك ىشىندە ەلەكتروندىق پوشتا ارقىلى PDF فورماتىندا الادى. COVID-19 ۆيرۋسىنا كۇدىكتى بولعان جاعدايدا وسى كەزەڭدە تەستىلەنۋشى مامانداندىرىلعان اۋرۋحاناعا اۋىستىرىلادى. ءموبيلدى سكرينينگ- ورتالىق ساعات 08.00 دەن 20.00 گە دەيىن دەمالىسسىز، ىندەتتىڭ سوڭىنا دەيىن جۇمىس ىستەيتىن بولادى»، - دەيدى قالا اكىمىنىڭ ورىنباسارى باقتيار ماكەن.

ءموبيلدى ورتالىقتىڭ جۇمىس كەزەڭدەرى كەلەسى كەستە بويىنشا قۇرىلادى: كىرۋ — تىركەۋ — زەرتتەپ- تەكسەرۋ — ۇلگى الۋ— شىعۋ. كىرگەننەن كەيىن تەستىلەنۋشىلەر جەكە اقپارات، ەپيدەميولوگيالىق فاكتورلارمەن بايلانىستى سيمپتومدارى بار ساۋالنامانى تولتىرادى. كابينادا دەنە تەمپەراتۋراسى كونتاكتىسىز تەرمومەتر كومەگىمەن ولشەنەدى. تەكسەرۋ ءادىسى ۆيرۋستىڭ تارالۋىن بولدىرماۋ جونىندەگى شارالاردىڭ ادەتتەگى مودەلىنە اينالدى.

«موبيلدى ورتالىق تۇرعىندار كوپ جۇرەتىن جەرگە ورنالاستىرىلدى. قاجەتتىلىك بولسا قالانىڭ باسقا جەرلەرىندە دە اشىلۋى مۇمكىن. بۇل جەردە بويىندا اۋرۋ بەلگىلەرى جوق ادامدار تەكسەرىلە الادى. تەست اقىسىن قولما- قول اقشا رەتىندە بەرۋگە دە، بانك كارتاسى ارقىلى اۋدارۋعا دا بولادى» ، - دەيدى №2 قالالىق كوپبەيىندى اۋرۋحانانىڭ ديرەكتورى يۆان لي.

نۇر- سۇلتاندا وسىنداي پۋنكتتىڭ اشىلۋى قالا تۇرعىندارى اراسىندا جاسىرىن اۋرۋ وشاقتارىن انىقتاۋعا جانە اسقىنۋلارعا جول بەرمەي، ۋاقتىلى سانيتارلىق- ەپيدەميولوگيالىق جانە ەمدەۋ- الدىن الۋ شارالارىن قابىلداۋعا مۇمكىندىك بەرەدى.


سوڭعى جاڭالىقتار