گەرمانيا، فرانسيا جانە قىتاي باسشىلارى COVID-19 ىندەتىمەن كۇرەستە ءوز ۇسىنىستارىن ءبىلدىردى
«الەمدەگى كوروناۆيرۋس پاندەمياسى مەن قازىرگى ەپيدەميولوگيالىق جاعدايعا بايلانىستى دۇنيەجۇزىلىك دەنساۋلىق ساقتاۋ ۇيىمىنىڭ وتىرىسى ونلاين رەجيمدە وتۋدە. بۇل جولى كۇن تارتىبىندە تەك ءبىر ماسەلە بار - COVID-19 ىندەتىنە جاھاندىق تۇرعىدا جاۋاپ بەرۋ. اسسامبلەيانىڭ كۇن ءتارتىبىنىڭ ەكىنشى بولىگى 2020-جىلدىڭ كەيىنگى كەزەڭىنە اۋىستىرىلدى. وندا العاشقى مەديتسينالىق-سانيتارلىق كومەك تۋرالى استانا دەكلاراتسياسىن جاھاندىق دەڭگەيدە ىسكە اسىرۋ جوسپارى تۋرالى شەشىم قابىلداناتىن بولادى. وتكەن جىلى دۇنيەجۇزىلىك دەنساۋلىق ساقتاۋ اسسامبلەياسىنىڭ 72-سەسسياسىندا العاشقى مەديتسينالىق-سانيتارلىق كومەك تۋرالى رەزوليۋتسيا ءبىراۋىزدان قابىلدانعانىن، وندا مەملەكەتتەر استانا دەكلاراتسياسىنا سايكەس العاشقى مەديتسينالىق-سانيتارلىق كومەكتى كۇشەيتۋگە شاقىرىلعانىن ەسكە سالا كەتەيىن»، - دەپ جازدى ەلجان ءبىرتانوۆ فەيسبۋكتەگى پاراقشاسىندا.
مينيستر وتىرىستىڭ اشىلۋ سالتاناتىندا شۆەيتساريا پرەزيدەنتى سيمونەتتا سومارۋگا، ب ۇ ۇ باس حاتشىسى انتونيۋ گۋتەرريش، قىتاي حالىق رەسپۋبليكاسىنىڭ ءتوراعاسى شي جينپيڭ، فرانسيا پرەزيدەنتى ەممانۋەل ماكرون، وڭتۇستىك كورەيا پرەزيدەنتى مۋن چجە ين، گەرمانيانىڭ كانتسلەرى انگەلا مەركەل ءسوز سويلەگەنىن ايتىپ ءوتتى.
سونىمەن قاتار وتىرىستى وڭتۇستىك افريكا رەسپۋبليكاسىنىڭ باسشىسى سيريل رامافوسا، باربادوس پرەمەر-ءمينيسترى ميا موتتلي جانە دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى، تەدروس ادحانوم گەبرەيۋس ءسوز العان.
«انتونيو گۋتەرريش دۇنيەجۇزىلىك دەنساۋلىق ساقتاۋ ۇيىمىنىڭ جەتەكشىلىگىمەن بۇكىل الەمدە كوروناۆيرۋسپەن كۇرەسۋ ءۇشىن كەلىسىلگەن كۇش-جىگەردىڭ ماڭىزدىلىعىن اتاپ ءوتتى. «بۇكىل الەم بىرىگەدى نەمەسە جەڭىلەدى» دەدى ب ۇ ۇ باس حاتشىسى.
شي جينپيڭ ءوز سوزىندە الەمدىك قاۋىمداستىققا بىرنەشە ۇسىنىس ايتتى.
مىسالى دۇنيەجۇزىلىك دەنساۋلىق ساقتاۋ ۇيىمى كوروناۆيرۋسقا قارسى كۇرەستى باسقارۋى كەرەكتىگىن اتاپ ءوتتى. وسىعان بايلانىستى قىتاي مەملەكەتتەردى اتالمىش ۇيىمدى ساياسي جانە قارجىلىق جاعىنان قولداۋعا شاقىرادى.
حالىقارالىق ىنتىماقتاستىقتى نىعايتۋ - وتكەن ساباقتاردىڭ ۇمىتىلماۋىن قامتاماسىز ەتۋدىڭ كەپىلى. سونداي-اق، قىتاي باسشىسى ۆاكتسينا جاسالعاننان كەيىن ونى الەممەن بولىسۋگە جانە ونى قوعامعا پايدالى ەتۋگە دايىن ەكەندىكتەرىن ايتتى.
ەممانۋەل ماكرون بولسا د د س ۇ- نىڭ كوروناۆيرۋسپەن كۇرەستەگى جەتەكشى ءرولىنىڭ ماڭىزدىلىعىن جانە ۇيىمدى فرانسيادان قارجىلاندىرۋ كولەمىنىڭ ەداۋىر ارتتىرىلعانىن جەتكىزدى.
انگەلا مەركەل الەمدەگى بىردە-ءبىر مەملەكەت جاپادان جالعىز كوروناۆيرۋس پروبلەماسىن جەڭە المايتىنىن مالىمدەدى. گەرمانيا كانتسلەرى د د س ۇ دەنساۋلىق ساقتاۋدىڭ جاھاندىق پروبلەمالارىن شەشەتىن زاڭدى ۇيىم ەكەنىن ەسكە سالدى»، - دەپ جازادى مينيستر.
وتىرىستىڭ قورىتىندىسىندا تەدروس گەبرەيەسۋس COVID-19 دەرتىنە قارسى بۇكىل الەم ەلدەرىن بىرىگۋگە شاقىردى. ونىڭ ايتۋىنشا، سەرولوگيالىق زەرتتەۋلەر وتە ايقىن كورىنىستى بەرىپ وتىر.
كوروناۆيرۋستان اۋىر زارداپ شەككەن ەلدەردە قانداعى انتيدەنە بار حالىقتىڭ ۇلەسى 20 پايىزدان از. ال كوپتەگەن ەلدە ول 10 پايىزدان دا تومەن. بۇل الەم حالقىنىڭ كوپشىلىگى وسى ۆيرۋسقا ءالى دە شالدىعۋى مۇمكىن ەكەنىن بىلدىرەدى.
«سوندىقتان، تاعى ءبىر رەت ەسكە سالامىن: قازىرگى ۋاقىتتا ءبىزدىڭ تۇرعىندار ءۇشىن بارلىق قاۋىپسىزدىك شارالارى - الەۋمەتتىك قاشىقتىق جانە جەكە گيگيەنا ەرەجەلەرىن ساقتاۋ وتە ماڭىزدى»، - دەپ ءتۇيدى مينيستر.
وتىرىستا قازاقستان دەلەگاتسياسىنىڭ مالىمدەمەسى بۇگىن تۇندە جاريالانادى.