قازاقپارات ساراپشىسى «قۇرمەت» وردەنىنە يە بولدى

«ەكى كۇن بۇرىن ءبىز بۇقارالىق اقپارات قۇرالدارى قىزمەتكەرلەرىنىڭ كۇنىن اتاپ وتتىك. سوعان بايلانىستى ارىپتەسىمىز مۇراتبەك ماقۇلبەكوۆتى ارنايى «قۇرمەت» وردەنىمەن ماراپاتتاۋ ءۇشىن جينالىپ وتىرمىز. مۇراتبەك اعامىز 2005-جىلدان بەرى «قازاقپارات» ساپىندا جۇمىس ىستەپ كەلەدى. وسى ۋاقىت ارالىعىندا جاس بۋىنعا كاسىبيلىكتىڭ تەڭدەسسىز ۇلگىسىن كورسەتتى. وسى ەڭبەگى ەسكەرىلىپ، بۇگىن «قۇرمەت» وردەنى تابىستالىپ وتىر»، - دەدى ق ر پرەزيدەنتى تەلەراديوكەشەنى باس ديرەكتورىنىڭ ورىنباسارى تىلەگەن ابىشيەۆ.

مۇراتبەك ماقۇلبەكوۆ 1992-جىلدان بەرى جۋرناليستيكا سالاسىندا ەڭبەك ەتىپ ءجۇر.

ال «قازاقپارات» حالىقارالىق اقپارات اگەنتىگىنىڭ ورىس رەداكسياسىنىڭ ساپىندا 2005-جىلدان بەرى جۇمىس ىستەيدى.

تاجىريبەلى ارىپتەسىمىز وقىرمان قاۋىمعا ءوزىنىڭ تالداۋ ماتەريالدارىمەن، مازمۇندى سۇحباتتارىمەن تانىمال.

اقپارات سالاسىنىڭ ساقا مامانىن «قازاقپارات» ۇجىمى مارتەبەلى ماراپاتىمەن قۇتتىقتايدى.