حۋاڭحى وزەنىنىڭ قىتاي ءۇشىن ماڭىزى زور

None
None
نۇر-سۇلتان. قازاقپارات - قىتاي وركەنيەتىنىڭ مىڭداعان جىلدىق تاريحى بار. ول حۋاڭحى مەن چاڭجياڭ وزەندەرى ارالىعىنداعى قۇنارلى القاپتا قالىپتاستى.

حۋاڭحى قازاق تىلىنە اۋدارعاندا سارى وزەن. وزەننىڭ شىعىستاعى كورشىمىز ءۇشىن ماڭىزى وتە زور. حۋاڭحى اتاۋى قىتاي حالقىنىڭ قالىپتاسقان ورىنى سانالادى. جەرگىلىكتى تۇرعىندار بۇل وزەندى ەرەكشە قۇرمەتتەپ، انا دەپ تە اتايدى. ۇزىندىعى 5 مىڭ شاقىرىمداي حۋاڭحى 140 ميلليون ادامدى اۋىز سۋ سۋمەن قامتيدى. سۋارمالى جەر دە وسى وزەنگە بايلانعان.

تاپ وسى جەردە ەكى مىڭ ەكى جۇزدەي جىل بۇرىن الەمدەگى ەڭ العاشقى سۋلاندىرۋ قۇرىلىستارىنىڭ ءبىرى سالىنعان ەكەن.

«نيڭشيا- حۋەيزۋ اۆتونوميالىق اۋدانىنداعى ەجەلگى سۋارۋ جۇيەسى وسى وڭىردەگى ەڭ باعالى تاريحي مۇرا. 2017 -جىلى ول يرريگاتسيا جانە سۋلاندىرۋ بويىنشا حالىقارالىق كوميسسيانىڭ دۇنيەجۇزىلىك مۇرا نىساندارىنىڭ تىزىمىنە قوسىلدى»، دەيدى حۋاڭحى وزەنىندەگى ۇلكەن كانون قىزمەتكەرى دين جياجين.

وسى جۇيەنىڭ ارقاسىندا حۋاڭحى وزەنىنىڭ بويى تىرشىلىككە ەڭ قولايلى اۋدان سانالادى. جالپى بۇل ايماق قۇرعاق وڭىرگە جاتادى. مۇندا جىلىنا تەك 300 ميلليمەتر جاڭبىر جاۋادى. وسىدان 60 جىلدان بۇرىن سالىنعان سۋ بوگەتى ەنەرگيانىڭ ماڭىزدى كوزى سانالادى. بۇل كەشەننىڭ ارقاسىندا سۋارىلاتىن جەر اۋدانى 330 مىڭ گەكتارعا جەتىپ، ەكى ەسە ارتقان. ءبىراق وزەن سۋ تىم كوپ پايدالانعاننىڭ كەسىرىنەن ەكولوگيالىق ماسەلەلەر ۋشىعىپ، سۋ دەڭگەيى تومەندەپ كەتتى.

«2018 -جىلدان بەرى حۋاڭحىدەگى سۋ ساپاسىن باقىلاپ كەلەمىز. بۇل ماقساتتا وزەنگە اعىلاتىن بۇكىل سۋدىڭ ساپاسىن تەكسەرەمىز. اراسىندا تۇرمىستىق پەن اۋىلشارۋاشىلىق اعىندار بار. سونداي- اق 2018-2019 -جىلدارى وزەن جاعاسىن كوگالداندىرۋ باعدارلاماسىن باستادىق»، دەيدى ۋجۋن قالاسى سۋ شارۋشالىعى باسقارماسى جەتەكشىسىنىڭ ورىنباسارى ما سيۋەحاي.

حۋاڭحى بويىن جاعالاي 28 شاقىرىم جەرگە ءبىر جارىم ميلليون اعاش پەن بۇتا ەگىلدى. بۇل قىتاي تىرشىلىگىندە نەگىزگى كۇرەتامىر سانالاتىن وزەننىڭ ارناسىن تۇزەپ، ەكولوگيالىق احۋالدى جاقسارتۋعا كومەكتەسەدى. ويتكەنى حۋاڭحى ءجيى تاسىپ، ارناسىن وزگەرتىپ وتىراتىنى بەلگىلى.



24.kz


سوڭعى جاڭالىقتار