احمەت بايتۇرسىن ۇلىنىڭ تۋعان اۋىلىندا مۋزەي-ءۇي سالىنادى

بۇل تۋرالى قازاقپارات ءتىلشىسىنىڭ ساۋالىنا جاۋاپ بەرگەن قوستاناي وبلىستىق مادەنيەت باسقارماسىنىڭ باسشىسى ەرلان قالماقوۆ ءمالىم ەتتى.

«جىلدىڭ باسىندا جەرگىلىكتى حالىقپەن كەزدەسكەن كەزدە وبلىس باسشىلارىنا وسى تويدان كەيىن ەستەلىك بولىپ قالاتىن مۋزەي- ءۇي سالىنسا، اۋىلعا جول تارتىلسا دەگەن تىلەك ايتىلدى. قازىرگى ۋاقىتتا جاڭادان ءۇي سالۋعا بايلانىستى قۇرىلىس جۇمىستارىنا كونكۋرس وتكىزىلىپ جاتىر. جۋىردا مەردىگەر انىقتالىپ، جاڭا مۋزەي- ءۇيدىڭ قۇرىلىسى باستالادى. بۇل تەك قاڭىراپ تۇرعان بوس ءۇي بولمايدى. ونىڭ ىشىندە جابدىقتار، احمەت اتامىزدىڭ ءومىرى مەن تۋعان جەرىنە بايلانىستى ەستەلىكتەردەن حاباردار بەرەتىن دۇنيەلەر قويىلادى»، - دەپ جوسپارلارىمەن ءبولىستى باسقارما باسشىسى.

ەرلان قالماقوۆ مۋزەي- ءۇيدىڭ قۇرىلىسى قىركۇيەك ايىنا دەيىن اياقتالاتىنىن جەتكىزدى. سونداي- اق ول احمەت بايتۇرسىن ۇلىنىڭ تۋعان ءۇيى بۇزىلدى دەگەن اقپاراتقا قاتىستى پىكىر ءبىلدىردى. «بۇل جەردە انىقتاپ الاتىن جاعداي بار. بۇل احمەت بايتۇرسىن ۇلىنىڭ ءدال تۋعان ءۇيى ەمەس. ول تۋرالى تاريحي ناقتىلانعان اقپارات تا جوق. 2009 -جىلى سارىتۇبەك قونىسىنداعى ەسكى ۇيلەردىڭ نەگىزىندە شامامەن وسى احمەتتىڭ ءۇيى بولۋى كەرەك-اۋ، دەگەن كوپشىلىكتىڭ ىقىلاسىمەن كوتەرگەن ءۇي. ول ءۇي اۋىلدىڭ اكىمى جانە تۇرعىنداردىڭ كومەگىمەن سالىنعان»، - دەپ تۇسىنىك بەردى ەرلان قالماقوۆ. ەسكە سالا كەتەيىك، ۇلت ۇستازىنىڭ 150 جىلدىق مەرەيتويى قارساڭىندا قوستاناي حالىقارالىق اۋەجايىنا احمەت بايتۇرسىن ۇلىنىڭ ەسىمى بەرىلدى.