«قۇرىلتاي» موبيلدى قوسىمشاسى كۇزدە ىسكە قوسىلادى

None
None
نۇر-سۇلتان. قازاقپارت - ۇلتتىق قۇرىلتايدىڭ جاڭا زامانداعى ءرولى، ماقسات- مۇراتى نەدە؟ ونىڭ ۇلتتىق قوعامدىق سەنىم كەڭەسىنەن ايىرماشىلىعى قانداي؟

بۇل «Miras» رەسپۋبليكالىق قوعامدىق كەڭەسىنىڭ كەزەكتى وتىرىسىندا تالقىلاندى، دەپ حابارلايدى قازاقپارات.

ءوز كەزەگىندە «ەگەمەن قازاقستان» ا ق باسقارماسىنىڭ ءتوراعاسى، «AMANAT» پارتياسى ساياسي بيۋروسىنىڭ مۇشەسى دارحان قىدىرالى قۇرىلتايدى اشىق قوعامنىڭ تاعى ءبىر كورىنىسى دەپ باعالاپ، ونىڭ وزگە كەڭەسۋ الاڭدارىنان ايىرماشىلىعىن كەڭىنەن تارقاتىپ ايتتى.

«جاڭا قازاقستاننىڭ مىندەتى - اشىق ازاماتتىق قوعام قۇرۋ، ادىلەتتى مەملەكەت ورناتۋ، دەموكراتيالىق ۇدەرىستەردى جۇرگىزۋ. ال قۇرىلتاي اشىق ازاماتتىق قوعامدى دامىتۋعا ۇلكەن ۇلەس قوسادى. مۇنداعى ايتىلعان پىكىرلەردىڭ بارلىعى ەلدىڭ مۇڭ-مۇقتاجىن، حالىقتىڭ تىلەگىن جەتكىزۋى ءتيىس. قۇرىلتاي - بۇل حالىقتىق قۇرىلىم. سوندىقتان ونى اشىق قوعامنىڭ تاعى ءبىر كورىنىسى دەپ ايتۋعا بولادى. بىزدە پارلامەنت، ءماجىلىس، سەنات، اسسامبلەيا جانە باسقا دا مىنبەرلەر بار. ءبىراق قۇرىلتاي حالىق وكىلدەرىنىڭ اراسىنان جينالعاندىقتان، حالىقتىڭ ءسوزىن ايتاتىن بيىك مىنبەر بولادى دەپ سەنەمىز»، دەدى دارحان قىدىرالى.

العاشقى قۇرىلتايعا 117 ادام ىرىكتەلىپ الىنعانى بەلگىلى. دەگەنمەن، بۇل ءتىزىم اۋىسىپ تۇرادى. بەلسەندى، حالىق ءۇشىن، ەلدەگى ورتاق ماسەلەلەردى شەشۋ ءۇشىن ۇلەس قوسامىن دەگەن كەز كەلگەن قازاقستاندىق ازاماتتىڭ بولاشاقتا وسى كەڭەسكە قاتىسۋعا مۇمكىندىگى بار.

بۇل تۋرالى «باس رەداكتورلار كلۋبى» رەسپۋبليكالىق قوعامدىق بىرلەستىگىنىڭ پرەزيدەنتى، ۇلتتىق قۇرىلتاي ءتوراعاسىنىڭ ورىنباسارى بيبىگۇل جەكسەنباي ايتتى.

ونىڭ ايتۋىنشا، قازىر «قۇرىلتاي» دەپ اتالاتىن ارنايى موبيلدى قوسىمشا جاسالىپ جاتىر. ول كۇزدە ىسكە قوسىلادى.

موبيلدى قوسىمشا ارقىلى كەز كەلگەن ازامات ءوز ۇسىنىسىن قۇرىلتايعا جولداي الادى.

«قۇرىلتايدىڭ ۇلتتىق كەڭەستەن ارتىقشىلىعى مۇندا ايماقتارداعى كەڭەستەردىڭ وكىلدەرى قاتىسادى. جەرگىلىكتى جەرلەردەگى ماسەلەلەر دە تىس قالماۋى ءۇشىن ارنايى تەلەۆيزيالىق جوبا قولعا الىنادى. ول - «حابار» جانە «Qazaqstan» تەلەارنالارىنىڭ ۇيىمداستىرۋىمەن وتەتىن ۇلكەن باعدارلاما. ياعني، ۇلتتىق قۇرىلتاي ماسەلەلەردى جىلىنا ءبىر رەت بولاتىن جيىندا تالقىلاپ قويماي، ۇزدىكسىز جۇمىس ىستەيتىن ۇلكەن الاڭ بولادى»، دەدى ب. جەكسەنباي.

ءوز كەزەگىندە «حابار» اگەنتتىگى» ا ق باسقارما ءتوراعاسى بەرىك ءۋالي تەلەارنادا «ۇلتتىق قۇرىلتاي» دەپ اتالاتىن ارنايى تەلەمارافون جانە مەملەكەت باسشىسى ايتقان ەڭبەك ادامىنا قۇرمەتتى ناسيحاتتاۋ ءۇشىن ارنايى جوبالار دايىندالىپ جاتقانىن جەتكىزدى.

سوڭعى جاڭالىقتار