قاراپايىم ازاماتتاردىڭ ۇلتتىق كومپانيالاردىڭ اكسيالارىن يەلەنۋ مۇمكىندىگى بولۋعا ءتيىس - پرەزيدەنت

جيىن بارىسىندا «استانا» حالىقارالىق قارجى ورتالىعىنىڭ (ا ح ق و) 2021 -جىلى اتقارعان جۇمىستارى قورىتىندىلاندى جانە ونى ءارى قاراي دامىتۋ جونىندەگى ۇسىنىستار قاراستىرىلدى.

قاسىم- جومارت توقايەۆ حالىقارالىق جاعداي قۇبىلىپ تۇرعان كەزدە ينۆەستيتسيالىق تۇراقتىلىق پەن بولجامدىلىقتى قامتاماسىز ەتۋگە قابىلەتتى سەنىمدى قارجى كوزدەرىن ىزدەۋ وزەكتى بولاتىنىن ايتتى. «استانا» حالىقارالىق قارجى ورتالىعى قازاقستان مەن بۇكىل ورتالىق ازيا ايماعى ءۇشىن وسىنداي مىندەتتى اتقاراتىن مەكەمەلەردىڭ ءبىرى سانالادى.

- قازاقستان نارىقتىق، ەركىن ءارى باسەكەلى ەكونوميكانى قارقىندى ىلگەرىلەتۋگە باعىتتالعان دامۋدىڭ جاڭا كەزەڭىنە قادام باسىپ وتىر. مۇنداي جاعدايدا شەتەلدىك ينۆەستورلار مەن ساۋدا سەرىكتەستەرىنىڭ سەنىمىن ساقتاپ قالۋ جانە نىعايتۋ ءبىزدىڭ باستى باسىمدىعىمىز بولىپ قالا بەرەدى. وسىعان بايلانىستى احقو- نىڭ الەۋەتى ينۆەستيتسيالاردىڭ سەنىمدىلىگى مەن قاۋىپسىزدىگىنىڭ كەپىلى رەتىندە بارىنشا پايدالانىلۋعا ءتيىس، - دەدى پرەزيدەنت.

مەملەكەت باسشىسى ا ح ق و- نىڭ الدىندا جەتەكشى قارجى ورتالىعى رەتىندە ءوز مارتەبەسىن ينستيتۋتسيونالدى تۇرعىدان نىعايتۋ مىندەتى تۇرعانىن اتاپ ءوتتى. وسىعان وراي مەملەكەت باسشىسى ءبىرقاتار وزەكتى ماسەلەگە نازار اۋداردى. اتاپ ايتقاندا، قاسىم- جومارت توقايەۆ سانكسيالىق ماسەلەگە ءمان بەرە وتىرىپ، شەتەلدىك كومپانيالاردىڭ ا ح ق و- عا تىركەلۋ تالابى بارىنشا وڭاي ءارى ليبەرالدى بولۋعا ءتيىس ەكەنىنە توقتالدى.

پرەزيدەنت ا ح ق و- نىڭ شەتەلدىك سەرىكتەستەرمەن ديالوگ جۇرگىزۋى قاجەت ەكەنىن اتاپ ءوتتى جانە قارجى رەتتەۋشىلەرىمەن تىعىز ىقپالداستىق ورناتۋدىڭ ماڭىزدىلىعىن جەتكىزدى. وسى رەتتە جالپى ۇيلەستىرۋ جۇمىستارى ۇكىمەتكە جۇكتەلدى. سونداي- اق پرەزيدەنت ورتالىقتىڭ رەتتەۋشىلىك قىزمەتى مەن نورماتيۆتىك- قۇقىقتىق بازاسى دەربەستىگى مەن تاۋەلسىزدىگىن ساقتاپ قالۋى كەرەك ەكەنىن ايتتى. مەملەكەت باسشىسى ۇلتتىق كومپانيالاردى IPO- عا شىعارۋ جۇمىستارىن كەلەسى ماڭىزدى مىندەت رەتىندە اتادى. «سامۇرىق- قازىنا» اكسيونەرلىك قوعامى مەن ونىڭ ۇلتتىق كومپانيالارىنىڭ ءرولىن مىسالعا كەلتىردى.

- ەلىمىزدىڭ قاراپايىم ازاماتتارى ۇلتتىق كومپانيالاردىڭ اكسيالارىن يەلەنۋگە جانە سالىمدارىنان ءوز ديۆيدەنتتەرىن الۋعا مۇمكىندىگى بولۋعا ءتيىس. ءدال وسىنداي جولمەن حالىقتىڭ ينۆەستيتسيالىق مادەنيەتى قالىپتاسادى. IPO- عا قاتىسۋ قازاقستاننىڭ بارلىق تۇرعىنى ءۇشىن قولجەتىمدى بولۋى قاجەت. ول ءۇشىن قاعازباستىلىق پەن بيۋروكراتيانى بولدىرمايتىن جاڭا تسيفرلىق شەشىمدەر كەرەك، - دەدى مەملەكەت باسشىسى.

سونىمەن قاتار قاسىم- جومارت توقايەۆ ۇزاق مەرزىمدى شەتەلدىك ينۆەستورلاردى تەڭگە تۇرىندەگى تاۋەلسىز وبليگاتسيالارعا تارتۋدىڭ وزەكتىلىگىن اتاپ ءوتتى. پرەزيدەنت قازىرگى قۇبىلمالى جاعدايدا ينۆەستيتسيالار مەن رەسۋرستار ءۇشىن باسەكەلەستىك كۇشەيەدى دەگەن پىكىر ءبىلدىردى. ينۆەستورلار كورپوراتيۆتىك باسقارۋ قاعيداتتارى جوعارى دەڭگەيدە ساقتالاتىن، زاڭ ۇستەمدىك ەتەتىن جانە حالىقارالىق يۋريسديكتسياسى بار الاڭداردى ىزدەيدى.

- ەلىمىزگە جاڭا ءارى سەنىمدى ينۆەستيتسيا كوزدەرى قاجەت. ول ءۇشىن حالىقارالىق دەپوزيتارييلەرمەن ءوزارا تىعىز ىقپالداستىق ورناتۋ كەرەك. مۇنداي جاعدايدا رەتتەۋشىلىك رەجيم مەن حالىقارالىق قۇقىققا نەگىزدەلگەن احقو الاڭى تارتىمدى بولادى. ۇكىمەتكە ۇلتتىق بانكپەن جانە احقو- مەن بىرلەسە وتىرىپ، ۇزاق مەرزىمدى ينستيتۋتسيونالدىق ينۆەستورلارى بار الەمدىك ينفراقۇرىلىمعا قوسىلۋ ماسەلەسىن پىسىقتاۋدى تاپسىرامىن. بۇل ەكونوميكامىزدىڭ ورنىقتى ءوسىمى ءۇشىن ماڭىزدى قادام بولماق، - دەدى پرەزيدەنت.

بۇدان بولەك مەملەكەت باسشىسى ورنىقتى دامۋ ماقساتتارىنا قول جەتكىزۋ جانە «جاسىل» جوبالاردى جۇزەگە اسىرۋ ماسەلەسىنە توقتالدى. ونىڭ ايتۋىنشا، بىلتىر ورنىقتى قارجىلاندىرۋ نارىعىنىڭ كولەمى 500 ەسە ۇلعايىپ، 250 ميلليون دوللاردان استى. ونىڭ ىشىندە جاسىل وبليگاتسيالار مەن نەسيەلەردىڭ 58 پايىزىن احقو جاسىل قارجى ورتالىعى ناقتىلادى.

- بۇل ەكونوميكانى كومىرتەگىنەن ارىلتۋ جانە كومىرتەگىن از پايدالانۋ تەحنولوگيالارىن دامىتۋ جونىندەگى جاھاندىق مىندەتتەردى ەلىمىزدىڭ ءساتتى شەشۋگە قابىلەتتى ەكەنىن دالەلدەۋىنە ىقپال ەتەدى. ۇكىمەتتى، «استانا» حالىقارالىق قارجى ورتالىعىن جانە كەڭەس مۇشەلەرىن وسى باعىتتاعى جۇمىستىڭ قارقىنىن باسەڭدەتپەي، جالعاستىرا بەرۋگە شاقىرامىن، - دەدى پرەزيدەنت.

قاسىم- جومارت توقايەۆ ەنەرگيا تاسىمالداۋشى جاھاندىق نارىقتاردىڭ جانە الەمدىك ازىق- تۇلىك ورتالىقتارىنىڭ ترانسفورماتسيالانۋى كەزىندە قازاقستاننىڭ ءرولىن كۇشەيتۋ ماڭىزدى ەكەنىنە نازار اۋداردى. اتاپ ايتقاندا، مەملەكەت باسشىسى ۇزدىك حالىقارالىق ستاندارتتارعا سايكەس كەلەتىن جانە كەز كەلگەن تاۋەكەل- قاتەرلەردەن الشاق تۇراتىن باستى تاۋار بيرجاسىن ورنالاستىرۋ ماسەلەسىن شەشۋدىڭ وزەكتىلىگىن اتاپ ءوتتى.

- قازاقستان ءۇشىن سەنىمدى ءارى باسەكەگە قابىلەتتى ينفراقۇرىلىمى بار بيرجا نارىعى جونىندە مالىمدەۋ وتە ماڭىزدى. بۇل ايماقتىق جانە جاھاندىق ساۋدادا كوشباسشىلىققا يە بولۋ ءۇشىن جاڭا مۇمكىندىكتەرگە جول اشادى. ۇكىمەت وسى ماسەلەنى جان- جاقتى پىسىقتاۋى كەرەك، - دەدى پرەزيدەنت.

مەملەكەت باسشىسى كريپتويندۋستريا جانە سيفرلىق اكتيۆتەردى دامىتۋ ماسەلەلەرىنە دە توقتالدى.

- ءبىز الەۋەتىمىزدى بارىنشا ءتيىمدى پايدالانۋىمىز كەرەك. ەلىمىز كريپتواكتيۆتەردى شىعارۋ بويىنشا ەكىنشى ورىندا تۇر. الايدا ءبىز تەك قانا شيكىزات مارتەبەسىن ۇستانىپ قالماۋىمىز كەرەك. وسى ورايدا، ۇكىمەت قارجى رەتتەۋشىلەرىمەن جانە «استانا» حالىقارالىق قارجى ورتالىعىمەن بىرلەسە وتىرىپ، كەشەندى سيفرلىق ەكوجۇيەنى دامىتۋ ءۇشىن قولايلى جاعداي جاساۋى قاجەت، - دەدى قاسىم- جومارت توقايەۆ.

مەملەكەت باسشىسى جيىندى قورىتىندىلاي كەلە، ا ح ق و- نىڭ 2021 -جىلى اتقارعان جۇمىسىنىڭ جىلدىق ەسەبىن بەكىتتى. ءىس- شارا بارىسىندا پرەمەر- مينيستر ءاليحان سمايىلوۆ، ا ح ق و باسقارۋشىسى قايرات كەلىمبەتوۆ، مەملەكەت باسشىسىنىڭ ەكونوميكالىق دامۋ جونىندەگى شتاتتان تىس كەڭەسشىسى سەر سۋما چاكرابارتي، قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا، ا ح ق و- نىڭ تاۋەلسىز قارجى باقىلاۋشىسى مارك سميت، جاھاندىق دامۋ ورتالىعىنىڭ پرەزيدەنتى احمەد ماسۋد، G30 توبىنىڭ قامقورشىلىق كەڭەسىنىڭ ءتوراعاسى دجەيكوب فرەنكەل، Citigroup ۇكىمەتتەر مەن مەملەكەتتىك سەكتوردىڭ جاھاندىق بلوگىنىڭ باسشىسى دجۋلي موناكو بايانداما جاسادى.