ازەربايجان مۇعالىمدەرى قازاقستاندىق ارىپتەستەرىنىڭ تاجىريبەسىن ۇيرەنۋگە كەلمەك

بۇل تۋرالى ازەربايجاننىڭ ءبىلىم ءمينيسترى ەمين امرۋللايەۆ ق ر وقۋ-اعارتۋ ءمينيسترى اسحات ايماعامبەتوۆپەن كەزدەسۋىندە ايتتى، دەپ حابارلايدى قازاقپارات.

«ءبىز قازاقستان ۇيىمداستىراتىن وقۋشىلار اراسىنداعى وليمپيادانىڭ بىردە-ءبىرىن جىبەرىپ الماعانىمىزدى ماقتانىشپەن ايتا الامىز. ارينە، كورگەنىمىز ءوزىمىز ءۇشىن وتە قىزىق. سەبەبى، سىزدەردە WorldSkills قوزعالىسى (كوللەدج ستۋدەنتتەرى اراسىنداعى الەم چەمپيوناتى) اۋىز تولتىرىپ ايتارلىقتاي دەڭگەيدە دامىعان. بىزگە قازاقستاننىڭ تاجىريبەسىن زەرتتەۋگە ۋاقىت كەرەك. مۇمكىن كەيبىر كوماندالار ءبىزدىڭ بالالارمەن بىرگە جاتتىعادى. مىسالى، فيزيكا، ينفورماتيكا، ماتەماتيكا پاندەرىنەن وليمپيادالاردا. ءبىز ەلىمىزدە STEAM فەستيۆالىن وتكىزەمىز جانە وعان قازاقستاندىق مەكتەپتەردى قاتىسۋعا شاقىرامىز. مەنىڭ ويىمشا، مەكتەپتەرمەن بىرلەسىپ جۇمىس ىستەۋ بىزگە قىزىقتى بولادى. قازان ايىندا مۇعالىمدەرىمىز قازاقستانعا كەلىپ، ارىپتەستەرىنىڭ تاجىريبەسىن ۇيرەنۋى ءۇشىن ءتيىستى قۇجاتتاردى جىبەرە الامىز»، - دەدى ەمين امرۋللايەۆ.

ول سونداي-اق، قازاقستان مەن ازەربايجان ءۇشىن ايماقتىق ءبىلىم بەرۋ پلاتفورماسىن قۇرۋ يدەياسى تۋرالى ايتتى.

قازىردىڭ وزىندە ازەربايجان، تۇركيا، گرۋزيا جانە بەلارۋس ەلدەرى وسى باعىتتا ىنتىماقتاستىق ورناتا باستادى. ق ر وقۋ-اعارتۋ ءمينيسترى اسحات ايماعامبەتوۆ قازاقستاننىڭ بىرلەسىپ جۇمىس ىستەۋگە دايىن ەكەنىن اتاپ ءوتتى.

ۆەدومستۆو باسشىسى ەلىمىز قازاقستاندىق بالالاردىڭ STEAM فەستيۆالىنە قاتىسۋىنا جاعداي جاسايتىنىن جانە ازەربايجاندىق مۇعالىمدەر ءۇشىن تانىستىرۋ جۇمىستارىن جۇرگىزەتىنىن ايتتى.