تاعى ءبىر ماڭىزدى قۇندىلىق - مەملەكەتتىك ءتىلدى ودان ءارى دامىتۋ - ەرلان قارين
سونداي-اق ەلدىڭ بىرلىگى مەن قوعامدىق تارتىپكە كەسىرىن تيگىزۋى مۇمكىن تىلگە قاتىستى سەزىمتال ماسەلەلەردى ساياسيلاندىرۋعا ەش جول بەرىلمەۋى كەرەك.
بۇل تۋرالى مەملەكەتتىك كەڭەسشى ەرلان قارين ءوزىنىڭ Youtube ارناسىندا ايتتى، دەپ حابارلايدى قازاقپارات ءتىلشىسى.
«قوعام ازاماتتىق جاۋاپكەرشىلىكتى دامىتۋى، جالاڭ ۇراندارعا جانە ساياسي اۆانتيۋريزمگە ۇرىنباۋى، راديكاليزم مەن ەكسترەميزمنىڭ كەز-كەلگەن تۇرىنە قارسى تۇرۋى كەرەك. بۇل قوعامدىق شارت ۇلتتىڭ جاڭا ساپاسىن كوزدەيتىن جاڭارعان، جالپىۇلتتىق قۇندىلىقتارعا نەگىزدەلەدى. جاڭا قۇندىلىقتاردىڭ وزەگى - ەڭبەكقورلىق، ەڭبەك ادامىنا قۇرمەت، كاسىبي ماماننىڭ ابىروي- بەدەلى، قاراپايىمدىلىق، ۇنەمشىلدىك جانە ءارقاشان ءبىلىم- بىلىكتىلىكتى ارتتىرۋعا ۇمتىلۋ سياقتى قاسيەتتەر بولماق. وسى قۇندىلىقتارعا باسىمدىق بەرۋ ارقىلى ءبىز ۇلت ساپاسىن جاڭا دەڭگەيگە كوتەرە الامىز. تاعى ءبىر ماڭىزدى قۇندىلىق - مەملەكەتتىك ءتىلدى ودان ءارى دامىتۋ. بۇل رەتتە ونى بارلىق سالالاردا باسەكەگە قابىلەتتىلىگىن ارتتىرۋ ءۇشىن ۇتقىر ادىسكە كوشۋ قاجەت. سونداي-اق ەلدىڭ بىرلىگى مەن قوعامدىق تارتىپكە كەسىرىن تيگىزۋى مۇمكىن تىلگە قاتىستى ەتنوسارالىق قاتىناس جانە باسقا دا سەزىمتال ماسەلەلەردى ساياسيلاندىرۋعا ەش جول بەرىلمەۋى كەرەك»، - دەدى مەملەكەتتىك كەڭەسشى.
ەرلان قارين بۇل جۇمىس باعىتتارىنان بولەك، ۇلتتىق قۇرىلتايدىڭ ماڭىزدىلىعىنا توقتالدى. مەملەكەتتىك كەڭەسشىنىڭ ايتۋىنشا، قۇرىلتاي قوعامدىق تالقىلاۋ ارقىلى ەل تاعدىرىنا ىقپال ەتەتىن ۇزاقمەرزىمدى ستراتەگيالىق شەشىمدەردى قابىلدايتىن ينستيتۋت بولادى.
ەسكە سالا كەتەيىك، بۇعان دەيىن ەرلان قارين ۇلتتىق قۇرىلتاي نەگىزگە الاتىن ءۇش قۇندىلىقتى تۋرالى ايتقان بولاتىن.
اۆتور: ءاليحان اسقار