ەسەپ كوميتەتى بيۋدجەتتى جوسپارلاۋدىڭ ءۇشجىلدىق جۇيەسىنەن باس تارتۋدى ۇسىندى

«بيىل ءبىر جاعىنان قارابايىر بولىپ كورىنگەنىمەن، وتە ماڭىزدى ماسەلە كۇن تارتىبىنە شىقتى. بيۋدجەت جوباسى بەكىتىلگەن جاعدايدا تولىقتاي قالىپتاستىرىلۋى كەرەك دەگەن تالاپ قويىلدى. بيۋدجەتتىڭ دامۋعا بولىنگەن بولىگى تولىق قامتاماسىز ەتىلىپ، شىعىستار جاعى جەتكىلىكسىز بولۋى مۇمكىن ەمەس. سوندىقتان قالاي بولعاندا دا، بۇل قاجەتتىلىكتى جىلدىڭ ورتاسىندا ۇلتتىق قوردان جابۋعا تۋرا كەلەدى»، - دەدى ناتاليا گودۋنوۆا پارلامەنتتىڭ بىرلەسكەن وتىرىسىندا. ونىڭ سوزىنە قاراعاندا، بۇل ىستە بيۋدجەت تاۋەكەلدەرىن ءتيىمدى باسقارۋ ماڭىزدى.

«ۇشجىلدىق بيۋدجەت دەگەن فورمالدى دۇنيە عانا بولىپ قالعانى بارشاعا ايان. ءۇش جىلدىق بيۋدجەتتى قالىپتاستىرۋدىڭ وزىنە عانا وتە كوپ ۋاقىت كەتىپ جاتىر. ال ناقتىلاۋ جانە تۇزەتۋ كەزىندە العاشقى ءبىر جىلى عانا ەسكەرىلەدى. قالعان ەكى جىلىنا ءمان دە بەرمەيمىز. كەلەسى كەزەڭگە بيۋدجەت جوسپارلاعان كەزدە وتكەن جولى قولداۋ تاپقان شىعىستاردىڭ ءبىر بولىگى ءتۇسىپ قالۋى دا مۇمكىن. سالدارىنان اياقسىز قالعان جوبالار، قۇرىلىسى بىتپەي قالعان نىساندار پايدا بولادى. ءبىزدىڭ ويىمىزشا، ءبىرجىلدىق بيۋدجەت جوسپارلاۋ جۇيەسىنە ورالۋ ماسەلەسىن كوتەرەتىن كەز كەلدى»، - دەدى كوميتەت باسشىسى.

ق ر رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعاسى ناتاليا گودۋنوۆا دونور وڭىرلەرگە ترانسفەرت ءبولۋ جۇيەسىن سىنادى.

«دونور وڭىرلەردەن رەسپبۋليكالىق بيۋدجەتكە نەعۇرلىم كوپ ءتۇسىم الىنسا، سوعۇرلىم كوپ ترانفەرت قايتا بەرىلەدى. ياعني، احۋال وزگەرمەي تۇر. بيىل دونور وڭىرلەردەن 490 ميلليارد تەڭگە ءتۇسىمدى رەسپۋبليكالىق بيۋدجەتكە الۋ كوزدەلگەن. دەگەنمەن، ماقساتتى ترانسفەرتتەر رەتىندە 712 ميلليارد تەڭگە ءبولۋ جوسپارلانعان»، - دەدى ناتاليا گودۋنوۆا.

ونىڭ ايتۋىنشا، وسىنىڭ سالدارىنان ترانسفەرت كولەمى الىم كولەمىنەن 45 پايىز جوعارى بولماق. «ۇكىمەت ءوزى ازىرلەگەن تاسىلدەردى ساقتاپ، مەتوديكانى تولىقتىرىپ پىسىقتاسا دەگەن ويىمىز بار. سوندا عانا جاڭادان قۇرىلعان ءۇش وبلىستىڭ مىسالىندا 2023 -جىلدىڭ بيۋدجەتىن قالىپتاستىرۋ شارالارى وڭىرلەر اراسىنداعى تەڭگەرىمسىزدىك قالاي رەتتەلەتىنىن كورسەتەر ەدى»، - دەدى ەسەپ كوميتەتىنىڭ ءتوراعاسى.

ايتا كەتۋ كەرەك، ناتاليا گودۋنوۆانىڭ دەرەگى بويىنشا، بىلتىر ۇلتتىق قوردان الىنعان قاراجات تۇسكەن كىرىستەن اسىپ كەتكەن.

اۆتور: ەسىمجان ناقتىباي