پرەزيدەنت قازاقستان اتاۋىن وزگەرتۋ تۋرالى پىكىر ءبىلدىردى
پرەزيدەنت قاسىم-جومارت توقايەۆ «ەكىنشى رەسپۋبليكا» ۇعىمى قولدانىسقا ەنگەلى ەلدىڭ رەسمي اتاۋىن وزگەرتۋ تۋرالى ۇسىنىستار ءجيى ايتىلىپ كەتكەنىن اتاپ ءوتتى.
«ستان» ءسوزىن ەلىمىزگە دە، بۇكىل ازياعا دا جات ۇعىم دەپ سانايدى. مۇنى دا قيسىندى دەپ ايتۋعا بولمايدى. سەبەبى، الەمدە ءدال وسىنداي پاكىستان، ءۇندىستان، اۋعانستان جانە ورتالىق ازيا مەملەكەتتەرى بار»، - دەدى پرەزيدەنت.
مەملەكەت باسشىسى ەلىمىز وسىعان دەيىن «قازاقستان رەسپۋبليكاسى» اتاۋىمەن ءوز تاريحىنداعى ماڭىزدى كەلىسىمدەرگە قول قويعانىن ەسكە سالدى.
«ەڭ باستى ماسەلە - ءبىز تاۋەلسىز ەلىمىز قازاقستان رەسپۋبليكاسى اتىنان 30 جىل ىشىندە كوپتەگەن حالىقارالىق كەلىسىمشارتتارعا قول قويدىق. مەملەكەتتىك شەكارامىزدى بەكىتتىك. وسىنداي جاعدايدا مەملەكەتىمىزدىڭ اتاۋىن وزگەرتۋ جاۋاپسىز شەشىم بولار ەدى. بۇل، ەڭ الدىمەن ۇلتتىق قاۋىپسىزدىگىمىزگە جانە حالقىمىزدىڭ بەيبىت ومىرىنە تىكەلەي اسەرى بار وتە ماڭىزدى ماسەلە»، - دەدى مەملەكەت باسشىسى.
ايتا كەتەيىك، پرەزيدەنت ۇلىتاۋ وبلىسىنداعى جۇمىس ساپارى اياسىندا ۇلتتىق قۇرىلتايدىڭ العاشقى وتىرىسىنا قاتىسىپ جاتىر.
كەشە مەملەكەت باسشىسىنىڭ ۇلتتىق قۇرىلتاي قۇرۋ تۋرالى جارلىعى جاريالاندى.
ۇلتتىق قۇرىلتايدىڭ قازىرگى قۇرامىندا ءماجىلىس دەپۋتاتتارى مەن ق ح ا مۇشەلەرىنەن، ازاماتتىق قوعام مەن ساياسي پارتيا وكىلدەرىنەن، ساراپشىلار مەن وڭىرلەردەگى قوعامدىق كەڭەس مۇشەلەرىنەن، كاسىپكەرلەردەن جاساقتالعان 117 ادام بار.
سولاردىڭ ءبىر پاراسىن اتاساق، اقىن مۇحتار شاحانوۆ، قازاقتىڭ تۇڭعىش عارىشكەرى توقتار اۋباكىروۆ، اكادەميك اسقار جۇمادىلدايەۆ، ەكونوميست جاقسىبەك كۇلەكەيەۆ، ساياساتكەر ءاليحان بايمەنوۆ، جۋرناليست، مەديا-مەنەدجەر، قوعام قايراتكەرى ەرمۇرات باپي، پارلامەنتتىڭ بىرنەشە شاقىرىلىمىنىڭ دەپۋتاتى نۇرتاي سابيليانوۆ، بالۋان داۋلەت تۇرلىحانوۆ، عالىم-بيوتەحنولوگ كۇنسۇلۋ زاكاريا، ءدىنتانۋشى قايرات جولدىباي، عالىم انار فازىلجانوۆا سياقتى ەسىمدەر بار.
مەملەكەتتىك كەڭەسشى ەرلان قاريننىڭ جازباسىنا سۇيەنسەك، كەلەشەكتە قۇرىلتاي جۇمىسىنا قاتىسۋشىلار اۋىستىرىلىپ وتىرۋى مۇمكىن.