پرەزيدەنت مەملەكەتكە وپاسىزدىق جاساعانى ءۇشىن عانا جاۋاپقا تارتىلۋى مۇمكىن - مينيستر
«قىلمىستىق كودەكس بويىنشا پرەزيدەنتتىڭ ار-نامىسى مەن قادىر-قاسيەتى ءۇشىن جاۋاپكەرشىلىكتى كوزدەيتىن جالپى ءبىر باپ قالادى. بۇل - بارلىق پرەزيدەنتتەرگە ورتاق. ەلباسى ءۇشىن بولەك (ق ر تۇڭعىش پرەزيدەنتىن قورلاعانى ءۇشىن - رەد. ) باپ بولمايدى»، - دەدى قانات مۋسين سەنات كۋلۋارىندا تىلشىلەرگە بەرگەن سۇحباتىندا.
ءمينيستردىڭ ايتۋىنشا، ەل پرەزيدەنتى تەك مەملەكەتكە وپاسىزدىق جاساعانى ءۇشىن عانا جاۋاپقا تارتىلۋى مۇمكىن. سونىمەن بىرگە، ق. مۋسين تۇڭعىش پرەزيدەنت تۋرالى زاڭنىڭ كۇشى قالاي جويىلاتىنىن ايتتى.
«كونستيتۋتسيادان تۇڭعىش پرەزيدەنت تۋرالى جەكە زاڭ بولۋى كەرەك دەگەن نورما الىنىپ تاستالعاندىقتان، تيىسىنشە بۇل زاڭ بارىنەن الىنۋى كەرەك. بۇل كونستيتۋتسيادا قابىلدانعان وزگەرىستەرگە سايكەس جەكەلەگەن زاڭنامالىق اكتىلەرگە وزگەرىستەر ەنگىزۋ تۋرالى زاڭ جوباسى اياسىندا بولادى. ونى بيىل پارلامەنتتىڭ قاراۋىنا ەنگىزەدى»، - دەدى مينيستر.
اۆتور: ايجان سەرىكجان قىزى