ۇلىتاۋدىڭ ەڭ كورىكتى ءوڭىر بولاتىنىنا سەنەمىن - پرەزيدەنت

None
None
ۇلىتاۋ. قازاقپارات - ۇلىتاۋ وبلىسىنىڭ اكىمى بەرىك ءابدىعالي پرەزيدەنتكە وبلىستىڭ اكىمشىلىك ورتالىعى جەزقازعان قالاسىنىڭ جانە ءوڭىردىڭ قازىرگى جاعدايى مەن دامۋ پەرسپەكتيۆالارى تۋرالى باياندادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

ەكولوگيالىق احۋالدىڭ ناشارلاۋى، ايماق ارقىلى وتەتىن رەسپۋبليكالىق جولداردىڭ توزۋى، ەكونوميكانىڭ ءارتاراپتاندىرىلماۋى نەمەسە ءىرى كاسىپورىنعا تاۋەلدىلىك، ينجەنەرلىك كوممۋنيكاتسيا جۇيەلەرىنىڭ ەسكىرۋى جانە الەۋمەتتىك سالا ءوڭىردىڭ نەگىزگى پروبلەمالارى رەتىندە اتالىپ ءوتتى.


بەرىك ءابدىعالي ەكونوميكانى ءارتاراپتاندىرۋ ءىسىن جەدەلدەتۋ ءۇشىن ارنايى ەكونوميكالىق ايماق قۇرۋ قاجەت ەكەنىن ايتتى.

سونىمەن قاتار، قاسىم- جومارت توقايەۆتىڭ تاپسىرماسىنا سايكەس ءۇيتاس - ايدوس سۋ قۇبىرىنىڭ قۇرىلىسى 2025 -جىلى اياقتالاتىنىن، ال جەزقازعان قالاسىنا ەسقۇلا قۇبىرىمەن سۋ تارتۋ 2023 -جىلى باستالاتىنىن جەتكىزدى. ءوڭىر اكىمىنىڭ دەرەكتەرىنە سايكەس وبلىس ورتالىعىنداعى تۇرعىن ۇيلەردىڭ 33 پايىزى ەسكىرگەن. قازىر تۇرعىن ۇيلەردى جاڭارتۋ باعدارلاماسى جۇزەگە اسىرىلا باستادى.

سونىمەن قاتار، 2022-2023 -جىلدارى قالانىڭ جاڭا اۋدانىندا كوپ قاباتتى 20 تۇرعىن ءۇي سالۋ جوسپارلانىپ وتىر.


بەرىك ءابدىعالي قاسىم- جومارت توقايەۆقا الەۋمەتتىك سالاداعى ماسەلەلەردى شەشۋ ءۇشىن مەملەكەتتىك ۋنيۆەرسيتەت، قوسىمشا ءبىلىم بەرۋ ورتالىعىن، ساپالى مەكتەپتەر، دەنە شىنىقتىرۋ- ساۋىقتىرۋ سپورت كەشەندەرىن جانە فيلارمونيا زالىن سالۋ قاجەت ەكەنىن جەتكىزدى. جەزقازعان قالاسىنىڭ جانە ۇلىتاۋ وبلىسىنىڭ جاعدايىمەن تانىسقان پرەزيدەنت ءوڭىردى دامىتۋ جونىندەگى ۇسىنىستاردى قولدايتىنىن ايتتى.

مەملەكەت باسشىسى، ەڭ الدىمەن جەرگىلىكتى تۇرعىنداردىڭ تۇرمىس ساپاسىن جاقسارتۋ قاجەت ەكەنىن ەسكەرتتى. قاسىم- جومارت توقايەۆ ۇكىمەت پەن وبلىس اكىمدىگىنە جول ماسەلەسىنە، ەكولوگياعا، ءبىلىم سالاسىن دامىتۋعا كۇش سالۋدى تاپسىردى.

«قالا بارلىق جاعىنان تارتىمدى بولۋى كەرەك. جۇمىس وتە كوپ. مەن جەزقازعاننىڭ، وبلىستىڭ ەڭ كورىكتى ءوڭىر بولاتىنىنا سەنەمىن»، - دەدى پرەزيدەنت.


بۇدان كەيىن «قازاقمىس كومپانياسى» ج ش س باسقارما ءتوراعاسى ەدۋارد وگاي كاسىپورىندى جانە ءوڭىردى دامىتۋ جونىندە بايانداما جاسادى. كومپانيا جەزقازعان، ساتبايەۆ قالالارىنىڭ ينفراقۇرىلىمىن دامىتۋعا ۇلەس قوسپاق. بيزنەستىڭ الەۋمەتتىك جاۋاپكەرشىلىگى تۇرعىسىنان «قازاقمىس» بيىل 25,4 ميلليارد تەڭگە بولگەن.

بۇل بىلتىرعىعا قاراعاندا ەكى ەسە كوپ. مەملەكەت باسشىسى الداعى اۋقىمدى جۇمىستار ءۇشىن بۇل قارجىنىڭ جەتكىلىكسىز بولاتىنىن ايتىپ، بولىنەتىن قارجىنى كوبەيتۋ تۋرالى ۇسىنىسىن جەتكىزدى. «مەن مىنا ماسەلەگە توقتالعىم كەلەدى. وبلىس اكىمىنىڭ ءوڭىردى دامىتۋ تۋرالى جوسپارىن تىڭدادىڭىزدار. الەۋمەتتىك ماسەلەلەر شەشىمىن تابۋعا ءتيىس.

«قازاقمىس» كومپانياسىن وسى ىسكە بەلسەندى تۇردە اتسالىسۋعا شاقىرامىن. 25,4 ميلليارد تەڭگە مۇنداي اۋقىمدى جۇمىستار ءۇشىن جەتكىلىكسىز بولۋى مۇمكىن. قارجىنى ۇلعايتۋ مۇمكىندىگىن قاراستىرعان ءجون. الەۋمەتتىك نىسانداردىڭ قۇرىلىسىنا كومەكتەسۋ قاجەت. سپورت عيماراتتارى كەرەك. جەرگىلىكتى حالىق ۇلكەن ءۇمىت ارتىپ وتىر. وسى تۇرعىدان العاندا قالاداعى جاعدايدى جاقسارتۋىمىز كەرەك. ارينە، مادەني نىساندارعا دا ەرەكشە كوڭىل ءبولىنۋى قاجەت»، - دەدى قاسىم-جومارت توقايەۆ.

كومپانيا باسشىلىعى دەنساۋلىق ساقتاۋ، ءبىلىم بەرۋ، سپورت سالالارىنا ەرەكشە كوڭىل بولىنەتىنىن باياندادى.

اتاپ ايتقاندا، كەلەسى جىلى جەزقازعاندا بالالارعا ارنالعان سپورت اكادەمياسى مەن 200 بالاعا ارنالعان ينتەرنات سالۋ ماسەلەسى دە قاراستىرىلعان. قاسىم-جومارت توقايەۆ سپورت نىسانىن سالعاندا ءارتۇرلى سپورتتى قامتيتىن كوپفۋنكتسيالدى ەتىپ سالۋ قاجەت ەكەنىن اتاپ ءوتتى. سونىمەن قاتار كومپانيا جاڭا ستاندارتتارعا سايكەس تۇرعىن ۇيلەر قۇرىلىسىن قولعا الۋدى جوسپارلاپ وتىر.




سوڭعى جاڭالىقتار