قازاقستاندا وقۋشى قىزداردىڭ مەكتەپكە حيدجاب كيۋىنە رۇقسات بەرىلە مە؟
«قازاقستان - زايىرلى مەملەكەت. سول سەبەپتى مەكتەپتەر دە زايىرلى مەكەمە سانالادى. مەكتەپ فورماسى تۋرالى 2016-جىلعى بۇيرىق بار، ول كۇشىن جويعان جوق. ءبىز بىلىممەن قامتىلماي قالۋى مۇمكىن قىزداردى وقۋ پروتسەسىنە قوسۋ تۋرالى ايتىپ وتىرمىز. سوندىقتان بۇل ماسەلەنى شەشۋدىڭ جولدارى مەن تەتىكتەرىن ىزدەستىرىپ جاتىرمىز. بۇل جەردە اڭگىمە حيدجاب تۋرالى بولىپ وتىرعان جوق» دەيدى كوميتەت ءتوراعاسى.
ونىڭ ايتۋىنشا، قازىر ءتۇرلى ۇسىنىستار ءتۇسىپ جاتىر. سونىڭ ىشىندە ولاردى ءوزىمىزدىڭ وتاندىق مەكتەپتەردە ونلاين وقىتۋ مۇمكىندىگى جانە ولاردى وقۋ ۇدەرىسىنە تارتۋ بويىنشا باسقا دا ۇسىنىستار بار. ەڭ باستىسى، بارلىعىن ورتا بىلىممەن قامتۋ. بۇل بالالاردىڭ وسى بولىگىنىڭ مەكتەپتە ءبىلىم الۋى ءۇشىن جاسالىپ وتىر.
«تاعى ءبىر ايتارىم، قازىرگى ۋاقىتتا مەكتەپ فورماسىنا قاتىستى بۇيرىق ءوز كۇشىندە، ەشقانداي وزگەرىس ەنگىزىلگەن جوق. ءبىز بۇكىل بالانى بىلىممەن قامتاماسىز ەتۋدىڭ ءتۇرلى مۇمكىندىكتەرىن تالقىلايمىز. بۇل - ەموتسياعا بەرىلىپ شەشىلەتىن ماسەلە ەمەس، قوعامدا ءارتۇرلى پىكىرلەر بار ەكەنى راس. ەڭ الدىمەن بالالاردىڭ مۇددەسى مەن زاڭناماداعى نورمالاردى نەگىزگە الۋىمىز كەرەك» دەيدى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كاريموۆا.