اۋىل شارۋاشىلىعى مينيسترلىگى جايىلىم جەرلەرىن ءادىل ءبولۋدىڭ جاڭا تەتىگىن ازىرلەپ جاتىر

بۇل تۋرالى ق ر اۋىل شارۋاشىلىعى ۆيتسە- ءمينيسترى ءابىلحايىر تامابەك ايتتى، دەپ حابارلايدى قازاقپارات ءتىلشىسى.

«قازىرگى كۇنى وسى سۇراقتاردى شەشۋدىڭ بىرنەشە جولى قاراستىرىلىپ جاتىر. نەگىزى بۇل جۇمىستاردى جەرگىلىكتى اتقارۋشى ورگاندار جۇيەلى تۇردە ۇيىمداستىرۋى كەرەك. ءار جەرگىلىكتى جەردىڭ ءوز جۇكتەمەسى بار. ەلدى مەكەندەردە مال باسىنا جايىلىم جەرلەرى جۇكتەمەسىنەن اسقان جاعدايدا وندا سول ەلدى مەكەندەرگە شەكاراسىن كەڭەيتىپ، جايىلىم قوسىپ بەرەمىز دەپ وتىرمىز. ەكىنشى ماسەلە - يگەرىلمەگەن 5 ميلليون گەكتار جەردى قايتارۋ. سونىڭ ەسەبىنەن ەلدى مەكەنگە جاقىن جەرلەردى ەسكەرىپ، ولاردى ەلدى مەكەن شەكاراسىنا قوسىپ، بەكىتىپ بەرەمىز. ودان كەيىن ءبىر اۋىلدا 500، 1000 قوي نەمەسە 100 جىلقى ۇستايتىن ۇيلەر كەزدەسەدى. ال كەيدە ءبىر اۋىلدىڭ بار مالىن قوسسا 500 قوي عانا شىعادى. ياعني، جاڭاعى ءبىر عانا ادام ءوزىنىڭ 500 قويىن جايىپ جايىلىمدى بىردەن توزدىرادى. ول - ادىلەتسىزدىك. ونداي ازاماتتارعا ءبىز «اۋىلدان الىسىراق جەر بەرەيىك، ورمان قورىنان بولسا دا الىڭىز، باقتاشى جالداۋعا مۇمكىندىگىڭىز بار. مالدى سول جاققا جايساڭىز ەلدى مەكەن ماڭىنداعى جايىلىمدى اۋىلدىڭ ادامدارى تۇگەل پايدالانار ەدى» دەپ ايتىپ جاتىرمىز»، - ول «حابار 24» ارناسىنا بەرگەن سۇحباتىندا.

الايدا ونىڭ اتاپ وتۋىنشە، بۇل دا ماسەلەنىڭ تولىق شەشىمى ەمەس كورىنەدى.

«قازىر مىسالى 3 شاقىرىم راديۋسقا جەتىپ وتىرعان جەر ەرتەڭ 5، ودان كەيىن 10 شاقىرىم بولادى. اۋىسپالى جايىلىم جوق. اينالدىرا مالدى جايا بەرگەننەن جايىلىم جەر توزادى. كەلەسى جىلى وسى 3 شاقىرىم راديۋستاعى جەردە ءشوپ شىقپاي قالىپ، تۇرعىندار تاعى 5-10 شاقىرىمدى سۇرايدى. جايىلىم تۋرالى زاڭ بار. ول جەردە ناقتى اۋىل اكىمدەرىنىڭ جاۋاپكەرشىلىگى كورسەتىلگەن. جايىلىم سحەماسىن دۇرىس ۇيىمداستىرۋ كەرەك. اتا- بابالارىمىزدىڭ تاجىريبەسىندەگى كوكتەۋ، جايلاۋ، قىستاۋ، كۇزدەۋ تاجىريبەلەرى بولۋى ءتيىس. مۇنداي اۋىسپالى جايىلىمدى اۋىل اكىمدەرى ۇيىمداستىرۋ قاجەت. ال باقىلاۋ جەر ينسپەكتورلارىندا بولۋ كەرەك. اۋىل اكىمى دۇرىس ۇيىمداستىرماسا، وندا وعان ەسكەرتۋ بەرىپ، ودان كەيىن شارا قولدانۋ كەرەك، بولماسا اكىمشىلىك ايىپپۇل سالىنۋى ءتيىس. جالپى اۋىل اكىمدەرىنىڭ جاۋاپكەرشىلىگى بولعانىمەن دە بۇل تەتىك تولىق جۇمىس ىستەمەيدى. سوندىقتان قازىر وسى باعىتتا جاڭا تەتىك ازىرلەپ جاتىرمىز» ، - دەدى ءابىلحايىر تامابەك.

اۆتور مارلان جيەمباي