ەلوردا تۇرعىندارى قازاقستان حالقىنىڭ بىرلىگى كۇنىن اتاپ ءوتتى
بۇگىن ەلوردانىڭ ءتورت الاڭىندا شىعارماشىلىق ۇجىمدار مەن قالا ارتىستەرىنىڭ قاتىسۋىمەن كونسەرتتىك باعدارلامالار ءوتتى.
كونسەرتتەر ەكسپو الدىنداعى الاڭدا، Demalys Promenade جانە ستۋدەنتتەر ساياباعىندا، سونداي-اق استانالىق ورتالىق ساياباقتىڭ امفيتەاترىندا ۇيىمداستىرىلدى.
«بۇگىن ستۋدەنتتەر ساياباعىندا قازاقستان حالقىنىڭ بىرلىگى كۇنىنە وراي «ناز» مەملەكەتتىك ءبي تەاترىنىڭ ارتىستەرى بولىپ، قوناقتارعا كونتسەرتتىك باعدارلاما ۇسىنىپ، ءوز شىعارماشىلىعىمىزدى كورسەتتىك. وسىنداي مۇمكىندىك جاساعانى ءۇشىن قالا اكىمدىگىنە العىسىمىزدى بىلدىرەمىز. كونسەرت كوپۇلتتى حالقىمىزدىڭ دوستىعى مەن بىرلىگىن قولداۋ، قازاقستاندا تۇراتىن بارلىق ەتنوستاردىڭ ونەرى مەن مادەنيەتىن كورسەتۋ ماقساتىندا وتكىزىلدى»، - دەپ اتاپ ءوتتى «ناز» مەملەكەتتىك ءبي تەاترىنىڭ ءارتىسى سۇلتان بولاتبەك ۇلى.
مەرەكە قوناقتارى كونسەرتكە بۇكىل وتباسىلارىمەن كەلدى، ءتىپتى ءوتىپ بارا جاتقان جۇرت تا قوسىلىپ، تاماشالادى.
«ءبىز ەكسپوعا جاقىن ماڭايدا تۇرامىز، بالالارمىزبەن بىرگە سەرۋەندەۋ ءۇشىن اۋلاعا شىققانبىز. ءبىراق قاسىمىزدا كونسەرت ءوتىپ جاتقانىن ەستىپ، وسىندا كەلدىك. بۇگىنگى كۇن رايى دا وتە قولايلى، بىرلىك كۇنىن اتاپ وتۋگە مۇمكىندىك بەرىپ تۇر. سونىمەن، سىرتقا شىعىپ، قالانىڭ وزگە تۇرعىندارىمەن بىرگە ارتىستەرىمىزدىڭ شىعارماشىلىعىن تاماشالاپ، وزگە ۇلتتاردىڭ مادەنيەتىمەن تانىستىق»، - دەدى ەلوردا تۇرعىنى روزا بودەيەۆا.
«ۇيىمداستىرۋشىلارعا وسىنداي كونسەرت وتكىزگەنى ءۇشىن العىسىم شەكسىز. جۇرت مەرەكەلىك كوڭىل-كۇيدە، ءبارى ءماز-مەيرام. كونسەرت وتە كەرەمەت ءوتىپ جاتىر. ارتىستەرمەن بىرگە ءبي بيلەپ، كوڭىل كوتەردىك، ەرەسەكتەر ءۇشىن دە، بالالار ءۇشىن دە قىزىقتى بولدى. بارشا قازاقستاندىقتاردى بۇگىنگى مەرەكەمەن قۇتتىقتايمىن! ەلىمىزدە اسپانىمىز ءاردايىم اشىق، ءار وتباسىندا اماندىق بولسىن!» - دەپ قۇتتىقتادى ەلوردا تۇرعىندارىن استانالىق الەنا كارپوۆا.
سونىمەن قاتار ەكسپو ماڭىنداعى الاڭدا سپورتتىق-بۇقارالىق ءىس-شارا ۇيىمداستىرىلدى. قالا تۇرعىندارى ۇلتتىق سپورت تۇرلەرى بويىنشا، ناقتىراق ايتقاندا اسىق اتۋ، ارمرەستلينگ، ارقان تارتۋ جانە گىر كوتەرۋ بويىنشا جارىستارعا قاتىستى. ۇزدىكتەرگە سىيلىقتار تاپسىرىلدى.
«بارشاڭىزدى ايتۋلى مەرەكە - قازاقستان حالقىنىڭ بىرلىگى كۇنىمەن قۇتتىقتايمىن! وسىنداي مەرەكە كۇنى حالىق وركەسترىنىڭ كونتسەرتى ۇيىمداستىرىلىپ، ونىڭ رەپەرتۋارىندا ءتۇرلى ەلدەردىڭ كومپوزيتسياسى، الەمدىك مۋزىكانىڭ جاۋھارلارى شىرقالدى. ۇيىمداستىرۋشىلارعا كوپ-كوپ راقمەت، ءتىپتى كۇن رايى دا مەرەكەلىك كوڭىل-كۇي سىيلاپ تۇر»، - دەپ اتاپ ءوتتى مەرەكەنىڭ قوناعى سۆەتلانا شينكارۋك.