USD 425.02 EUR 450.1
RUB 7.17 CNY 63.75
جاڭالىقتار

اۋرۋحانا قىزمەتكەرلەرى جاپپاي تارتىپسىزدىك كەزىندە تاۋلىك بويى وپەراتسيا جاسادى - الماتى

26 قاڭتار 20:42
:ءبولىسۋ
اۋرۋحانا قىزمەتكەرلەرى جاپپاي تارتىپسىزدىك كەزىندە تاۋلىك بويى وپەراتسيا جاسادى - الماتى

الماتى. قازاقپارات - الماتى اكىمى باقىتجان ساعىنتايەۆ قالالىق جەدەل شۇعىل كومەك كورسەتۋ اۋرۋحاناسىنا باردى، دەپ حابارلايدى قازاقپارات ءتىلشىسى.

كەزدەسۋگە باس دارىگەردىڭ ورىنباسارلارى، ءبولىم مەڭگەرۋشىلەرى، اعا مەدبيكەلەر قاتىستى.

اڭگىمە بارىسىندا ولار مەديتسينالىق كومەك كورسەتۋ بويىنشا جۇرگىزىلىپ جاتقان جۇمىستار تۋرالى ايتىپ، دامۋ پەرسپەكتيۆالارى جونىندە پىكىرلەرىمەن ءبولىستى.

قالا اكىمى بارلىق دارىگەرلەر مەن مەديتسينا قىزمەتكەرلەرىنە كورسەتكەن باتىلدىعى ءۇشىن العىس ءبىلدىردى. 4-10- قاڭتار ارالىعىندا اۋرۋحانانىڭ قابىلداۋ بولىمىنە ءتۇرلى جاراقاتپەن - وق تيگەن، سوققىعا جىعىلعاندار كوپتەپ ءتۇستى.

ەمدەۋ مەكەمەسىنە بارلىعى 305 ادام جۇگىندى. اۋرۋحانانىڭ بارلىق 9 وپەراتسيالىق ءبولىمى تاۋلىك بويى جانە ۇزدىكسىز جۇمىس ىستەدى، 259 وپەراتسيا جاسالدى. قۇرامىندا تراۆماتولوگ-دارىگەرلەر، حيرۋرگتەر، نەيروحيرۋرگتەر، انەستەزيولوگ-رەانيماتولوگتار، مەدبيكەلەر جانە باسقا دا ماماندار بار 6 بريگادا كۇشەيتىلگەن رەجيمدە جۇمىس ىستەدى.

اۋىر جاراقات العاندار شۇعىل تۇردە وپەراتسيالىق بلوكقا جىبەرىلدى، ورتاشا اۋىرلىقتاعى پاتسيەنتتەر بولىمشەلەرگە جاتقىزىلدى، جەڭىل جاراقات العاندار تەكسەرىلىپ، تاڭىلىپ، امبۋلاتوريالىق ەمدەۋگە ۇيلەرىنە جىبەرىلدى.

«وتە قاۋىپتى جاعدايعا قاراماستان، اۋرۋحانا قىزمەتكەرلەرى ناعىز ەرلىك پەن شىنايى پاتريوتيزمدى كورسەتتى، وزدەرىنىڭ كاسىبي بورىشىن باتىل ورىندادى»، - دەپ اتاپ ءوتتى باقىتجان ساعىنتايەۆ.

توتەنشە جاعداي كەزىندە جۇمىس ىستەگەن 430 قىزمەتكەر ماتەريالدىق كومەك الادى. اۋرۋحانانىڭ ماتەريالدىق-تەحنيكالىق بازاسىن ودان ءارى دامىتۋ ماقساتىندا قالا اكىمى قوعامدىق دەنساۋلىق باسقارماسىنا قاجەتتى مەديتسينالىق جابدىقتار مەن جەدەل جاردەم كولىكتەرىن ساتىپ الۋعا ءوتىنىم دايىنداۋدى تاپسىردى.

دەنساۋلىق ساقتاۋ مەكەمەلەرىن مودەرنيزاتسيالاۋدىڭ ءۇش جىلدىق باعدارلاماسى اياسىندا ليفتىلەردى ارنايى مەديتسينالىق ليفتىلەرگە اۋىستىرۋدى قاراستىرۋ قاجەت. بۇگىندە اۋرۋحانانىڭ قىزمەتى الماتى قالاسىنىڭ جانە بۇكىل قازاقستاننىڭ تۇرعىندارىنا جوعارى بىلىكتى شۇعىل جانە جوسپارلى مەديتسينالىق كومەك كورسەتۋگە باعىتتالعان.

ستاتسيونار 320 ورىنعا ەسەپتەلگەن. اۋرۋحانادا جەتەكشى مەديتسينالىق جوعارى وقۋ ورىندارىنىڭ كافەدرالارى ورنالاسقان. 2021-جىلى كلينيكا اۋىر جانە وتە اۋىر دارەجەلى COVID-19 پاتسيەنتتەرىن قابىلداي وتىرىپ، 1- ەشەلونداعى جۇقپالى اۋرۋلار اۋرۋحاناسى رەتىندە 5 اي جۇمىس ىستەدى. بارلىعى ك ۆ ي - دەن 3789 پاتسيەنت ەمدەلدى. الماتى اكىمدىگىنىڭ ارقاسىندا اۋرۋحانا ورتالىقتاندىرىلعان وتتەگى ستانتسياسىمەن قامتاماسىز ەتىلگەن.

«ب» جانە «ۆ» كلاسىنداعى مەديتسينالىق قالدىقتاردى زالالسىزداندىرۋ بويىنشا تەز قۇرىلاتىن مودۋلدىك كەشەندەر سالىندى. بۇگىندە اۋرۋحانا %100 مەديتسينالىق گازدارمەن قامتاماسىز ەتىلگەن جانە ءار پالاتادا وتتەگى كونسولدەرى ورناتىلعان.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات