USD 429.57 EUR 447.35
RUB 6.94 CNY 63.23
جاڭالىقتار

پوليتسەيلەردى بۇلىكشىلەر قولىنان قۇتقارعان؛ قىزىلوردا تۇرعىنىنا قۇرمەت كورسەتىلدى

26 قاڭتار 17:26
:ءبولىسۋ
پوليتسەيلەردى بۇلىكشىلەر قولىنان قۇتقارعان؛ قىزىلوردا تۇرعىنىنا قۇرمەت كورسەتىلدى

قىزىلوردا. قازاقپارات - قىزىلوردادا جاپپاي تارتىپسىزدىك كەزىندە ازاماتتىق ۇستانىمىن تانىتىپ، پوليتسيا قىزمەتكەرلەرىنە كومەك بەرگەن قالا تۇرعىنى ماقسات سەيىتجاپبار ۇلىنا قۇرمەت كورسەتىلدى، دەپ حابارلايدى قازاقپارات ءتىلشىسى.

سىن ساتتە ادامگەرشىلىك ۇلگىسىن كورسەتكەن ازاماتتى قالالىق پوليتسيا باسقارماسىنىڭ باستىعى ابدىبەك جانازاروۆ ارنايى قابىلدادى. جۇزدەسۋ بارىسىندا باسقارما باستىعى قالا تۇرعىنىنا قۇقىق قورعاۋ سالاسىنىڭ قىزمەتكەرلەرىنە قيىن ساتتە دەمەۋ بولعانى ءۇشىن العىس ءبىلدىردى.

«قالامىزدا 4-5- قاڭتار كۇنى جەرگىلىكتى تۇرعىنداردىڭ جينالۋىمەن بەيبىت شەرۋ بولدى. الايدا 5- قاڭتار كۇنگى شەرۋدىڭ سوڭى جانجالعا اينالىپ كەتتى. ويدا جوقتا بۇلىكشىلەر اراعا وت سالدى. بۇلىكشىلەر تاراپىنان پوليتسيا قىزمەتكەرلەرىن سوققىعا جىعىپ جاتقان جاعدايلار بولدى. سول ساتتە تەز ارادا ورتاعا اراشا ءتۇسىپ، ولاردى بارىنشا قورعاۋعا تىرىستىم»، - دەدى ماقسات سەيىتجاپبار ۇلى جۇزدەسۋ بارىسىندا.

جاناشىر جان 3-4 پوليتسەيدىڭ بۇلىكشىلەر قولىنان جاراقات الماۋىنا سەبەپكەر بولىپ، ولاردىڭ قاۋىپسىز جەرگە شىعۋىنا كومەكتەسكەن. قالالىق پوليتسيا باسقارماسى تاراپىنان م. سەيىتجاپبار ۇلىنا العىس ايتىلىپ، ەستەلىك سىيلىعى تارتۋ ەتىلدى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات