سامۇرىق- قازىنا قورىنىڭ باسشىلىعى پىسىقتالماعان شەشىمدەر جاساي باستادى - امانجان جامالوۆ

«ءماجىلىستىڭ جالپى وتىرىسىندا مەملەكەت باسشىسى «سامۇرىق- قازىنا» قورىنىڭ جۇمىسىن قايتا قاراۋ تۋرالى تاپسىرما بەردى. قوعامدا قوردىڭ تاعدىرىنا قاتىستى پىكىرتالاس باستالدى. دەگەنمەن مامانداردىڭ قۇزىرلى ءارى كاسىبي پىكىرىن حايپ پەن پوپۋليزم تولقىنى باسىپ بارا جاتقانى ەرەكشە الاڭداتىپ وتىر. وسى جاعدايدا قوردىڭ باسشىلىعى پىسىقتالماعان ءارى اسىعىس شەشىمدەر قابىلداي باستاعانىن كورىپ وتىرمىز. بۇل ءوز كەزەگىندە تەرىس سالدارعا الىپ كەلۋى مۇمكىن. وسىعان بايلانىستى قوردى جاڭعىرتۋعا قاتىستى جوسپارلى، قادامدىق جۇمىستارعا ورالۋ كەرەك دەپ سانايمىز»، - دەدى ا. جامالوۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.

ونىڭ پايىمىنشا، اسىعىس شەشىمدەر جاساماس بۇرىن قوردىڭ نە سەبەپتى ءتيىمسىز بولعانىن تالداۋ كەرەك.

«وسى ورايدا قوردىڭ بەيىندى جانە بەيىندى ەمەس اكتيۆتەرىنە كەشەندى اۋديت جۇرگىزۋ كەرەك. باسەكەلەستىك ورتاعا بەيىندى ەمەس كومپانيالاردى شىعارۋ شەشىمىن قابىلداعان ءجون. سونىمەن قاتار، بارلىق بەيىندى كومپانيالار جۇمىسىنىڭ تيىمدىلىگىن باعالاعان دۇرىس بولادى. ولارعا قارجىلىق ساۋىقتىرۋدى جۇرگىزىپ، وسىدان كەيىن قور نارىعى ارقىلى وتكىزۋ تۋرالى شەشىم قابىلداۋ كەرەك. ازاماتتار قوردىڭ ۇلەسىن يەلەنۋ قۇقىعىن قانداي فورماتتا السا دا، ءتيىستى باعالاۋ مەن ونىڭ ناتيجەسىن اشىق جاريالاماسا، ازاماتتار وزدەرىنە نە ۇسىنىپ وتىرعانىن بىلمەيتىن بولادى. ياعني بۇل تۇرعىدا «ناقتى ينۆەستيتسيالىق كىرىس بولا ما؟» نەمەسە «قوماقتى قارىزعا باتقان قۇرىلىمدى كورە مە؟».

ەگەر وسى سۇراققا ناقتى جاۋاپ بەرىلمەسە، وندا قازىرگى جانە بولاشاق الەۋەتتى ينۆەستورلار دا تۇسىنبەستىك جاعدايدا بولادى. ويتكەنى «سامۇرىق- قازىنا» بەرەشەگى 7,5 تريلليون تەڭگەدەن اسىپ ءتۇستى، بۇل 18 ميلليارد ا ق ش دوللارى شاماسىندا»، - دەدى ا. جامالوۆ.

ونىڭ ايتۋىنشا، قور قىزمەتىنە قاتىستى شەشىم قابىلداۋ مەن ونىڭ ۇيىمداستىرۋشىلىق قۇرىلىمىن وزگەرتۋ كەزىندە قوردىڭ سىرتقى قارىزدارىن نازارعا الۋ كەرەك. ەگەر قوردى رەفورمالاۋ بويىنشا شەشىمى پىسىقتالماي جاسالسا، بۇل ءوز كەزەگىندە كرەديتورلار اراسىندا دۇربەلەڭ تۋدىرۋى مۇمكىن. ولار كەز كەلگەن ۋاقىتتا پايىزدىق مولشەرلەمەنى كوتەرىپ، قارىزدى مەرزىمىنەن بۇرىن جابۋدى تالاپ ەتۋى ىقتيمال. وسى مىندەتتەمەلەر بويىنشا كەيىننەن ۇكىمەت جاۋاپ بەرەتىن بولادى.

«قوردىڭ بارلىق اۋدارىمدارى ورتالىقتاندىرىلىپ، مەملەكەتتىك مىندەتتەردى جۇزەگە اسىرۋعا بولۋمەن رەسپۋبليكالىق بيۋدجەتكە ءتۇسۋى كەرەك»، - دەدى دەپۋتات.

اۆتور: رۋسلان عابباسوۆ