اق وليمپيادا ويىندارىندا قازاقستان قانداي جەتىستىكتەرگە قول جەتكىزدى

بۇل قازاقستان تاۋەلسىزدىگىن العاننان بەرى قاتىسىپ وتىرعان سەگىزىنشى قىسقى وليمپيادا بولماق.

ءبىز بۇگىن قازاق ەلى وسىعان دەيىنگى اق وليمپيادا ويىندارىندا قانداي جەتىستىكتەرگە قول جەتكىزگەنىن ءبىر شولىپ شىعۋدى ءجون كوردىك.

قىسقى وليمپيادا ويىندارى تاريحىندا قازاقستاندىقتار اراسىنان العاشقى مەدالدى قوستانايلىق شاڭعىشى يۆان گارانين كەڭەس وداعى كەزىندە جەڭىپ العان. ول 1976-جىلى ينسبرۋك قالاسىندا وتكەن XII وليمپيادا ويىندارىندا ەكى قولا مەدال ەنشىلەگەن بولاتىن.

ال 1988-جىلى كالگاريدە وتكەن XV وليمپيادا جارىستارىندا شاڭعىشىلار ۆلاديمير ساحانوۆ - كۇمىس، ۆلاديمير سميرنوۆ قوس كۇمىس پەن قولا مەدالعا قول جەتكىزدى. الايدا، بۇل جۇلدەلەر ەل ەگەمەندىگىنە دەيىن بولعاندىقتان كوپ جاعدايدا ءجيى ايتىلا بەرمەيدى.

قازاق ەلى 1994-جىلى تۇڭعىش رەت تاۋەلسىز مەملەكەت رەتىندە اق وليمپيادادا باق سىناپ، كوك تۋىمىزدى ءتورتجىلدىق دودانىڭ تورىندە جەلبىرەتتى.

XVII قىسقى وليمپيادا ويىندارىندا ەل قۇراماسى قانجىعاسىنا 1 التىن، 2 كۇمىس مەدال سالىپ قايتتى. بۇل ءۇش مەدالدىڭ ۇشەۋىن دە شاڭعىشى ۆلاديمير سميرنوۆ الىپ بەردى. وسى جۇلدەلەردىڭ ارقاسىندا ەلىمىز جالپىكوماندالىق ەسەپتە 12-ورىنعا تۇراقتادى.

مىنە، سول ۋاقىتتان بەرى قازاقستان سپورتشىلارى قىسقى وليمپيادا ويىندارىنان بىردە-ءبىر التىن جۇلدە الا الماي كەلەدى.

1998-جىلى جاپونيانىڭ ناگانو قالاسىندا وتكەن ويىندارعا تاعى دا شاڭعىشى ۆلاديمير سميرنوۆ قاتىسىپ، «قولا» ەنشىلەدى. سونداي-اق كونكيمەن جۇگىرۋشى ليۋدميلا پروكاشيەۆاعا دا قولا مەدال بۇيىردى.

وكىنىشكە قاراي، 2002-جىلى ا ق ش- تىڭ سولت-لەيك-سيتي قالاسىندا وتكەن X Ⅸ جانە 2006 -جىلى يتاليانىڭ تۋرين قالاسىنداعى XX ويىنداردا وتانداستارىمىزدىڭ ەشبىرى جەڭىس تۇعىرىنان كورىنە العان جوق.

ال 2010-جىلى كانادانىڭ ۆانكۋۆەر قالاسىندا جالاۋى جەلبىرەگەن XXI قىسقى وليمپيادا ويىندارىندا قازاقستاندىق بياتلونشى ەلەنا حرۋستاليەۆا جەكەلەي سىندا كۇمىس مەدالدى جەڭىپ الدى.

2014-جىلى رەسەيدىڭ سوچي قالاسىندا وتكەن قىسقى ويىنداردا مانەرلەپ سىرعاناۋشى دەنيس تەن قوس باعدارلاما بويىنشا 255,1 ۇپاي جيناپ، قازاقستان قورجىنىنا قولا جۇلدەنى سالدى.

ال سوڭعى 2018-جىلى وڭتۇستىك كورەيانىڭ پحەنچحان قالاسىندا وتكەن ويىنداردا يۋليا گالىشيەۆا فريستايلدىڭ موگۋل تۇرىنەن ءبىر قولا مەدالعا قول جەتكىزدى.

قازاقستاننىڭ قىسقى وليمپيادا ويىندارىندا العان مەدالدار سانى:

1994 -جىل: 1 التىن، 2 كۇمىس مەدال

1998 -جىل: 2 قولا مەدال

2002 جانە 2006-جىلدارى جۇلدە بولعان جوق

2010 -جىل: 1 كۇمىس مەدال

2014 -جىل: 1 قولا مەدال

2018 -جىل: 1 قولا مەدال

مىنە، كورىپ وتىرعاندارىڭىزداي قازاقستان قىسقى وليمپيادا ويىندارىنان ۇزىن-سانى 8 مەدال جەڭىپ العان. ونىڭ بىرەۋى - التىن، ۇشەۋى - كۇمىس، تورتەۋى - قولا مەدال.

ەندىگى ءۇمىت «بەيجىڭ-2022» اق وليمپياداسى. باستى دودا 4- اقپان كۇنى باستالىپ، 16- اقپان كۇنى مارەسىنە جەتەدى.

قىتايدا جالپى سانى 109 مەدال ساراپقا سالىنادى.

جارىستار بەيجىڭ قالاسىنان بولەك قاسىنداعى يانتسين جانە چجيانتسزياكوۋ قالالارىندا دا وتەدى.

اۆتور: كۇنسۇلتان وتارباي