الماتى لومباردتارىنا كەلگەن شىعىندى وتەۋ ازىرگە قارالمايدى - اكىم ورىنباسارى
بۇل تۋرالى ونلاين بريفينگ بارىسىندا الماتى قالاسى اكىمىنىڭ ورىنباسارى ءىلياس وسەروۆ ءمالىم ەتتى، دەپ حابارلايدى قازاقپارات ءتىلشىسى.
وڭىرلىك ورتالىق كوممۋنيكاتسيالار قىزمەتىندە وتكەن بريفينگتە كاسىپكەر الماتىداعى تارتىپسىزدىك كەزىندە تونالعان لومباردتار تۋرالى سۇرادى.
سپيكەردىڭ سوزىنشە، لومباردتارعا كەلتىرىلگەن شىعىندى وتەۋ ماسەلەسى قارالدى، ءبىراق ازىرگە وتەۋ شاراسى قاراستىرىلمايدى.
«لومباردتارعا كەلەتىن بولساق، بۇل ماسەلە «اتامەكەن» بازاسىندا دا قارالدى. قازىرگى ۋاقىتتا لومباردتارعا كەلگەن شىعىندى وتەۋ شاراسى قاراستىرىلىپ جاتقان جوق»، - دەيدى ءىلياس وسەروۆ.
بۇعان دەيىن ول الماتىدا جاپپاي تارتىپسىزدىك كەزىندە زارداپ شەككەن كاسىپكەرلەردىڭ شىعىنى قالاي وتەلەتىنىن ايتقان بولاتىن.
ايتا كەتەيىك، الماتىدا جاپپاي تارتىپسىزدىك كەزىندە كەلتىرىلگەن شىعىننىڭ جالپى سوماسى 95 ميلليارد تەڭگەدەن اسادى.