ءماجىلىس «ق ر تۇڭعىش پرەزيدەنتى - ەلباسى تۋرالى» كونستيتۋتسيالىق زاڭعا تۇزەتۋ ەنگىزدى
بۇل جايىندا ءماجىلىس دەپۋتاتى قانات نۇروۆ ءمالىم ەتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ پارلامەنتتەگى سوڭعى سويلەگەن ءسوزى شىن مانىندە ريەۆوليۋتسيالىق بولدى. حالىق جەڭىل تىنىس الدى. ەندى پارلامەنت پەن ۇكىمەت ونىڭ بارلىق نەگىزدەمەلەرىن تولىق، شۇعىل ءارى ناقتى جۇزەگە اسىرۋى ءتيىس. ەڭ الدىمەن تۇڭعىش پرەزيدەنتتىڭ قازاقستان حالقى اسسامبلەياسى مەن قاۋىپسىزدىك كەڭەسىندەگى ءومىر بويعى ءتوراعالىعىن جويۋ قاجەت بولدى. بۇل جايىندا ول ءوزى جاريا ەتتى جانە بۇگىن ءبىز ىسكە اسىردىق»، - دەپ جازدى دەپۋتات Facebook-پاراقشاسىندا.
ونىڭ اتاپ وتۋىنشە، بۇگىن ءماجىلىس تاريحي شەشىم قابىلداپ، كونستيتۋتسيالىق زاڭدارعا وزگەرىستەر ەنگىزگەن.
«سەناتقا «ق ر تۇڭعىش پرەزيدەنتى - ەلباسى تۋرالى»، «قازاقستان حالقى اسسامبلەياسى تۋرالى» جانە «ق ر قاۋىپسىزدىك كەڭەسى تۋرالى» كونستيتۋتسيالىق زاڭدارعا بارلىق قاجەتتى تۇزەتۋلەر جونەلتىلدى. ەندىگى ۋاقىتتا ق ح ا مەن قاۋىپسىزدىك كەڭەسىنە ءتوراعالىق زاڭ بويىنشا، تۇلعاسى بويىنشا ەمەس لاۋازىمىنا بايلانىستى ق ر پرەزيدەنتىنە تيەسىلى بولادى»، - دەدى قانات نۇروۆ.
اۆتور: مارلان جيەمباي