سۇيىتىلعان گاز باعاسىنىڭ كۇرت ءوسۋىن شەكتەيتىن شارالار قابىلدانادى

None
None
نۇر- سۇلتان. قازاقپارات - سۇيىتىلعان گاز باعاسىنىڭ كۇرت ءوسۋىن شەكتەيتىن ءىس- شارالار قابىلدانادى.

بۇل تۋرالى بۇگىن ۇكىمەت وتىرىسىندا ق ر ەنەرگەتيكا ءمينيسترى بولات اقشولاقوۆ ايتتى، دەپ حابارلايدى قازاقپارات ءتىلشىسى.

«سۇيىتىلعان گاز نارىعىنداعى جاعدايدى تولىق باقىلاۋدى قامتاماسىز ەتۋ ماقساتىندا جەدەل ءىس- شارالار قابىلداندى. اتاپ ايتقاندا، ەنەرگەتيكا مينيسترلىگى 2 بۇيرىق بەكىتتى. ءبىرىنشىسى - 2023 -جىلعى 1-قاڭتارعا دەيىن ساۋدا- ساتتىق قاعيدالارىن توقتاتا تۇرۋ جونىندەگى بۇيرىق. وعان سايكەس ەنەرگەتيكا مينيسترلىگى سۇيىتىلعان گازدى ەلەكتروندىق ساۋدا- ساتتىقتان تىس وتكىزەتىن بولادى. ەكىنشىسى - سۇيىتىلعان مۇناي گازىنىڭ شەكتى كوتەرمە ساۋدا باعاسىن تومەندەتۋ جونىندەگى بۇيرىق. وعان سايكەس گازدىڭ ءبىر تونناسى 28 مىڭ تەڭگەگە دەيىن بەلگىلەنەدى»، - دەدى مينيستر.

سونىمەن قاتار ول بۇگىنگى كۇنى ەلەكتروندىق ساۋدا الاڭدارىنان تىس ىشكى نارىققا سۇيىتىلعان گازدى جەتكىزۋ جوسپارىن قالىپتاستىرۋ قاعيدالارىنا تۇزەتۋلەر ەنگىزۋ بويىنشا بۇيرىق ازىرلەنگەنىن ايتتى. بۇل تۇزەتۋلەر رەسپۋبليكا اۋماعىندا كوتەرمە جانە بولشەك ساۋدادا وتكىزۋ قۇقىعى بار سۋبەكتىلەردىڭ تىزبەسىن كەڭەيتۋ ارقىلى ەلدىڭ ىشكى نارىعىن سۇيىتىلعان گازبەن قامتاماسىز ەتۋگە باعىتتالعان.

«قىسقا مەرزىمدى ءىس- شارالار رەتىندە وسى جىلعى قاڭتار ايىنىڭ سوڭىنا دەيىن ۇكىمەتكە سۇيىتىلعان مۇناي گازى باعاسىنىڭ كۇرت ءوسۋىن شەكتەيتىن اشىقتىق قاعيداتتارى مەن تەتىكتەردى ەنگىزۋدى ەسكەرە وتىرىپ، ەلەكتروندىق ساۋدا الاڭى/تاۋار بيرجالارى ارقىلى سۇيىتىلعان گاز ساۋدا- ساتتىعىن ودان ءارى جەتىلدىرۋ جونىندە كەشەندى ءىس- شارالار ەنگىزىلەتىن بولادى. ۇكىمەتپەن كەلىسىلگەننەن كەيىن بۇل ءىس- شارالار نورماتيۆتىك قۇقىقتىق اكتىلەرگە تۇزەتۋلەر ەنگىزۋ تۇرىندە رەسىمدەلەدى»، - دەدى بولات اقشولاقوۆ.

سوڭعى جاڭالىقتار