قازاقستاندا كرەديت العانداردىڭ قۇقىعى قالاي قورعالادى

1-قازاننان باستاپ قيىندىققا تاپ بولعان قارىز الۋشىلاردىڭ قۇقىعىن قورعاۋ ءۇشىن بانكتەر مەن م ق ۇ ءۇشىن ازاماتتاردىڭ مەرزىمى وتكەن بەرەشەگىن رەتتەۋدىڭ مىندەتتى تەتىگى زاڭنامالىق تۇردە ەنگىزىلگەن. اگەنتتىكتە ءمالىم ەتكەندەي، پروبلەمالىق بەرەشەكتى رەتتەۋ ءراسىمىن باستاۋ ءۇشىن قارىز الۋشى كرەديتورعا، ياعني، بانككە نەمەسە م ق ۇ- عا ءتيىستى وتىنىشپەن جۇگىنۋگە ءتيىس. وتىنىشتە راستايتىن قۇجاتتار قوسا بەرىلە وتىرىپ، ت ا ءا، ج س ن، بايلانىس دەرەكتەرى، قارىز تۋرالى مالىمەتتەر، مەرزىمىن وتكىزىپ الۋدىڭ تۋىنداۋ سەبەپتەرى كورسەتىلۋگە ءتيىس.

ازاماتتارعا ىڭعايلى بولۋ ءۇشىن قارىز الۋشىلار وتىنىشتەردى جازباشا دا، قاشىقتان دا، ياعني، رەسمي ينتەرنەت- رەسۋرستار جانە كرەديتوردىڭ ەلەكتروندىق پوشتاسى ارقىلى بانكتەر مەن م ق ۇ- نىڭ بولىمشەلەرىنە بارماي-اق بەرە الادى. ءوتىنىش پەن راستايتىن قۇجاتتاردى العان كۇننەن باستاپ، كۇنتىزبەلىك 15 كۇن ىشىندە بانكتەر مەن م ق ۇ بورىشكەردىڭ قارجىلىق جانە الەۋمەتتىك جاعدايىن جەكە تارتىپپەن تالدايدى.

كورسەتىلگەن مەرزىمدە قارىز الۋشىعا بانكتىڭ نەمەسە م ق ۇ- نىڭ قارىزدى قايتا قۇرىلىمداۋ تالاپتارىمەن كەلىسەتىنى تۋرالى حابارلانۋعا ءتيىس. كرەديتور قارىزدى قايتا قۇرىلىمداۋ تالاپتارى بويىنشا كەلىسكەن كەزدە بانكتەر مەن م ق ۇ كەلەسى كۇنتىزبەلىك 15 كۇن ىشىندە قارىزدى نەمەسە ميكروكرەديتتى وتەۋدىڭ جاڭا كەستەسىن قابىلداي وتىرىپ، قارىز نەمەسە ميكروكرەديت شارتىنىڭ تالاپتارىنا قاجەتتى وزگەرىستەر ەنگىزۋگە مىندەتتى.

بانكتىك قارىز نەمەسە ميكروكرەديت شارتىنىڭ تالاپتارىن وزگەرتۋ تۋرالى ءوزارا قولايلى شەشىمگە قول جەتكىزىلمەگەن جاعدايدا، قارىز الۋشى قارجى نارىعىن رەتتەۋ جانە دامىتۋ اگەنتتىگىنە جۇگىنۋى كەرەك. قارىز الۋشىنىڭ ءوتىنىشى نەگىزىندە اگەنتتىك قارجى ۇيىمىنا قاتىستى قۇجاتتامالىق تەكسەرۋگە باستاما جاسايدى، ونىڭ شەڭبەرىندە كرەديتوردىڭ پروبلەمالىق بەرەشەكتى جانە قارىز الۋشىلاردىڭ قۇقىقتارىن رەتتەۋ پروتسەسىنە قويىلاتىن زاڭنامالىق تالاپتاردى ساقتاۋىنا تالداۋ جۇرگىزەتىن بولادى.

اگەنتتىككە مىناداي تاسىلدەرمەن جۇگىنۋگە بولادى: ەلەكتروندى ۇكىمەت پورتالى ارقىلى. «ەلەكتروندىق وتىنىشتەر» سەرۆيسىندە «ونلاين قىزمەتكە تاپسىرىس بەرۋدى» تاڭداۋ قاجەت جانە راستايتىن قۇجاتتاردى قوسا بەرە وتىرىپ، ءوتىنىش ءماتىنىن تولتىرادى. eOtinish ەلەكتروندىق سەرۆيسىنىڭ كومەگى ارقىلى.

ءوتىنىش بەرۋ eGov قوسىمشاسى ارقىلى جۇزەگە اسىرىلادى، «ءوتىنىش بەرۋ» سەرۆيسىندە «ءوتىنىش»-تى تاڭداپ، ءوتىنىش ءماتىنىن تولتىرادى. بانكتەر مەن م ق ۇ مەكەنجايى مەن تەلەفونىن وسى سىلتەمەدەن تابۋعا بولادى.

اۆتور: دۋمان ارعىنگەلدى